Уус Алдан улууһун Бороҕон нэһилиэгэр түөлбэлэринэн үлэлэр көхтөөхтүк ыытыллаллар. Манна олохтоохтор тэрээһиннэргэ, күрэхтэһиилэргэ өрө көтөҕүллэн кытталларын сэргэ, бар дьон сынньанарыгар, оҕо-уруу оонньууругар, наллаан олорон астына-дуоһуйа сэһэргэһэллэригэр анаан кыракый тутуулары дьэндэтэллэр. Бу туһунан бибилэтиэкэ үлэһитэ Светлана Прудецкая иһитиннэрэр.
«Биһиги дьоммут олус үөрүнньэҥнэр, киһиэхэ кэрэни, үтүөнү оҥорорго куруук кыһаллаллар. Дьон-сэргэ сынньанарыгар анаан хас биирдии түөлбэ бэйэтин баай фантазиятынан сынньанар сирдэри сиэдэрэйдик оҥорбуттара көрүөхтэн эриэккэс. Кэлбит ыалдьыттар бары көрөн сүргэлэрэ көтөҕүллэр, олус үөрэллэр, астыналлар. Манна олохтоохтор ситэри тупсаран сибэкки дьэрэкээнин олордоллор, кыылы-сүөлү, көтөрү-сүүрэри билисэпиэт хаамыратыттан, пластмасс бытыылкалартан, мастан, о.д.а. толкуйдаан оҥороллор. Араастаан кырааскалаан тупсаран, киэргэтэн биэрэллэрэ көрүөхтэн кэрэ», — диир Светлана.
Кини маны сэргэ нэһилиэктэригэр сыл аайы сибэкки, оҕуруот аһын олордуутугар куонкурус ыытыллара туһалааҕын кэпсиир. Маныаха куонкуруска кыттаары үүнээйи арааһын олордооччу сыллата элбээн иһэрин бэлиэтиир. Быйыл Татьяна Находкина, Варвара Алексеева, Ирина Черкашина, Татьяна Габышева, Раиса Софронова, Надежда Иванова, Анна Алексеева, Екатерина Сухонина, Варвара Петрова, Анастасия Габышева, Ольга Алексеева, Февронья Десяткина дьиэ кэргэттэрэ бастыҥтан бастыҥ буолан күрэстэһии кыайыылаахтарынан тахсан үөрбүттэр. Аны туран хаһаайкаларга көмөлөөх, туһалаах буоллун диэн саас аайы оҕуруотчуттарга маастар-кылаастар ыытыллаллара үгэс курдук буолбутун, күн уһаата да оҕуруотчуттар тэрээһини күүппүтүнэн баралларын этэр.
Бу курдук нэһилиэккэ ыытыллар үлэҕэ-хамнаска түөлбэ хас биирдии олохтооҕо ис дууһатыттан кыһамньытын ууран кыттыһара ордук кэрэхсэнэрин бэлиэтиир. Быйыл Мария Тимофеева салайааччылаах «Эрэл», Наталья Тютрина салайар «Дьулуур», Галина Алексеева «Үргэл», Светлана Васильева «Кэскил» түөлбэлэрэ тахсыылаах үлэлээхтэринэн биллибиттэр.
