Уус Алдан улууһугар Бороҕон нэһилиэгэр (Тумулга) общественнай түмсүүлэр үлэлэрэ бииртэн-биир куоталаспыт курдук уратылааҕынан, сэргэҕинэн сыаналанар. Олортон биирдэстэринэн улуус филиалынан буолбут «Үһүс көлүөнэ оскуолатын» чорботон этэллэр. Аҕам саастаахтар түмсүүлэрин Светлана Прудецкая салайар.
«Оскуолабыт 2015 сыл алтынньыга төрүттэммитэ. Манна барыта 20-чэ чилиэннээхпит. Үксүлэрэ бочуоттаах сынньалаҥҥа олорор кырдьаҕастар. Кинилэр дьиэҕэ олорон чуҥкуйбатынар, олохторун сэргэхситтинэр, дьоҥҥо туһалааҕы, наадалааҕы оҥоробун диэн куруук өрө көтөҕүллэн сырыттынар, ыарытыйар, санааргыыр, мунчаарар диэни умнан үйэлэрин уһаттынар диэн сыаллаах-соруктаах интэриэстэринэн араас куруһуоктары тэрийбиппит. Итиэннэ үлэбит тахсыыланан иһэриттэн, дьоммут-сэргэбит сүргэлэрэ көтөҕүллэриттэн үөрэбит», — диир Светлана Александровна.
Кини кэпсээбитинэн «Далбар» ырыаһыттар, «Сандалы» асчыт ааттаахтара, «Күөх сирэм» оҕуруотчут бастыҥнара, «Бөрүө» айар куттаахтар, «Дьээбэрэҥ» көрү көҕүлүттэн тутааччылар, хаалыктаах хаамыы, уран тарбахтаах иистэнньэҥнэр, быысыбайдьыттар, коллекционердар, о.д.а. куруһуоктар тэриллиэхтэриттэн болҕомтону тардыбыттар. Манна сылдьааччылар «Улаханнык сэргэхсийдибит. Бэйэбит үлэлиир тэрилтэлээх курдукпут» диэн чахчы да астыналларын, үөрэллэрин биллэрбиттэр. Маныаха оҕуруотчуттар саас арассаада олордуутун, үүнээйини көрүү-харайыы, бүөбэйдээһин туһунан нэһилиэнньэҕэ маастар-кылаастары ыыппыттарын олохтоохтор наһаа сөбүлээбиттэр, туһалаах сүбэни-аманы ылан махтаммыттар. Эмтээх отторунан дьарыктанар Галина Габышеваҕа ыйыталаһа, сүбэлэтэ кэлээччи үксээбит. Эдэр хаһаайкалар уран тарбахтаах иистэнньэҥнэртэн түүлээхтэн үтүлүк, бэргэһэ арааһын, таҥас кырадаһыныттан дьиэҕэ-уокка туһалаах малы-салы тигэргэ үөрэммиттэр. Быысыбайдьыт, оҕуруо анньааччы ааттаахтара уонна 83 саастаах Анна Турантаева бэртээхэй баайыыларынан ыччакка холобур буолбуттар. Маны сэргэ, быйыл “Түмсүү” сынньалаҥ киинигэр саха балаҕана аһыллыбыт үөрүүтүгэр, саастаахтар наара ороннорго бэйэлэрэ анаан тикпит олбохторун бэлэхтээн сөхтөрбүттэр. Педагогическай үлэ бэтэрээнэ Елена Аммосова маастар-кылаас оҥорорун сэргэ, иистэнньэҥнэргэ матырыйаалларынан көмө оҥорон үөлээннээхтэрин үөрдүбүт. Бу оскуолаҕа сылдьар ытык дьон «Азия оҕолоро» спортивнай оонньуу уотун көрсүү умнуллубат долгутуулаах күнүгэр сиэрин-туомун иилээн-саҕалаан тэрийбиттэрин кэнчээри ыччат болҕомтолоохтук көрбүт-истибит. Аҕам саастаахтар ити курдук туох баар үлэлэринэн-хамнастарынан, мындырдарынан, тэрийэр араас хабааннаах үлэлэринэн, тус бэйэлэрин сатабылларынан ыччакка эргиччи үтүө холобур буолаллар. Кинилэр биир сиргэ тэпсэҥнээбэккэ тустаах оскуолаларын салгыы сайыннаран иһэр соруктаахтар. Ол курдук, Үөһээ Бүлүү улууһугар баар «Көмүлүөк» түмсүү кыттыылаахтарын кытта көрсүбүттэр, үлэ үөрүйэҕин атастаспыттар. Итиэннэ маннык ньыманан үлэлээһиннэрин салгыыр баҕалаахтар.
Дьэ, бу курдук, тумуллар аҕам саастаахтарын оскуолалара иннин диэки дохсуннук хардыылыыр. Билигин кинилэр нэһилиэккэ, улууска ыытыллар араас дьаарбаҥкаларга, быыстапкаларга ыҥырыкка сылдьаллар. Онтон бөһүөлэк иһинээҕи кэнсиэрдэргэ култуура үлэһиттэрэ «далбардара», «дьээбэрэҥнэрэ» суох сатамматтарын этэллэр. Маныаха улуустааҕы ырыа күрэҕэр Анна Алексеевалар иккиэн уонна Матрена Новоприезжая кыайыы көтөллөммүттэриттэн, сылын аайы ыытыллар өрөспүүбүлүкэтээҕи, улуустааҕы көр-күлүү куонкуруһугар «дьээбэрэҥнэрэ» лауреат, дипломант курдук бочуоттаах ааттартан түспэттэриттэн дойдулаахтара киэн туттуохтарын тутталлар. Маны сэргэ, быйыл улууска а5ам саастаахтар ыһыахтарыгар тумуллар сиэдэрэй оҥоһуктарын көрбүт эрэ бары сөхпүтүн-махтайбытын, хомуска Василий Алексеев оонньоон дьүрүһүтэн кыайыылааҕынан тахсыбытын, хоһоон күрэҕэр Люция Попова киһини эрэ долгутардыы ааҕан бастаабытын, остуол оонньуутугар Розалия Васильева, Анна Алексеева тэҥнээхтэрин таһыччы куоппуттарын, сахалыы таҥаска Мария Халдеева бочуоттаах миэстэни ылбытын дойдулаахтара истиҥник ахталлар.
Маннык сэргэх үлэлээх түмсүү «Лучший филиал-2015» ааты ылбыт. Маныаха күрэхтэһиилэргэ, куонкурустарга баралларыгар күүс-көмө, өйөбүл буолар нэһилиэктэрин баһылыгар Василий Алексеевка, кырдьаҕастар сэбиэттэрин бэрэссэдээтэлигэр Иван Новоприезжайга, дьахталлар кэмитиэттэрин салайар Татьяна Габышеваҕа, култуура үлэһиттэригэр муҥура суох махтаналлар.
