Өрөспүүбүлүкэ үрдүнэн үһүс сылын ыытыллар Ырыа күнүн чэрчитинэн, Уус Алдан улууһун Тулуна нэһилиэгин «Татыйык» уһуйаанын (сэбиэдиссэй Татьяна Замятина) иитиллээччилэрэ «Татыйыктар ыллыыллар» диэн эҕэрдэ кэнсиэри олохтоохторго бэлэхтээтилэр.
Эҕэрдэ кэнсиэр уһуйаан хас да бөлөҕүн оҕолорун хорунан саҕаланна.
Бу киэһэ уһуйаан кыра бөлөҕүн иитиллээччилэрэ улахаттартан хаалсыбакка, үгүс нүөмэрдэргэ көхтөөхтүк кыттан, үҥкүүнү-ырыаны оройуттан туттулар. Ордук сахалыы, нууччалыы, цыганныы үҥкүүлэрэ көрөөчүлэр сүрэхтэрин тутта.
Кырачаан кыргыттар-уолаттар «Күнү олус таптыыбын», «Чэ, иккиэн оонньуохха», «Эбээм», Африкаҕа кыһын суох», «Дорообо сандал саас» ырыаларын иэйэн-куойан туран ыллаатылар. Оттон Эрсан Сергеев «Барабан», Сандаара Васильева «Переполох», Тайаана Копырина «Светлячок», Сахалина Троева, Валерия Акимова «Сахам сирин таптыыбын» хоһооннору ньиргиччи дорҕоонноохтук ааҕан, көрөөччүлэр биһирэбиллэрин ыллылар. Төрөппүттэр уонна нэһилиэк олохтоохторо оҕо саадын иитээччилэригэр уонна үлэһиттэригэр бэртээхэй бырааһынньыгы бэлэхтээбиттэригэр махталларын биллэрдилэр.
«Татыйык» оҕо саада хас да сыллааҕыта диэри эргэ мас дьиэҕэ үлэлиирэ. Онтон 2014 сыллаахха «Адгезия» ХЭУо 75 миэстэлээх саҥа корпуһу тутуоҕуттан, оҕолор аныгы олох ирдэбилигэр эппиэттиир уһуйаан дьиэтигэр күннэтэ сүргэлэрэ көтөҕүллэн үөрэ-көтө сылдьаллар.
