Бүлүү куоракка тулаайахтар дьиэлэрэ тымныыларын уонна адьас хаачыстыбата суох тутуллубуттарын туһунан хаста даҕаны суруллан турар. Онтон бүгүн тустаах дьиэлэргэ олорооччулар уонна Бүлүүтээҕи «СӨ гигиенаҕа уонна эпидемиологияҕа киинэ» тымныы диэн санааларын аһаҕастык эппиттэрин үрдүнэн, күттүөннээх быһаарыныы ылыллыбатаҕын туһунан edersaas.ru суруйар.
Быһах угун кыстыммат
Тулаайахтар үҥсүүлэрин борокуратуура тоҕо болҕомтоҕо ылан испэтий? Тоҕо ирдэбил, хонтуруол суоҕуй? Саас-сааһынан быһаарар буоллахха, маннык хартыына үөскээн тахсар. Холобур, Бүлүү куоракка Дружба переулогар 18/1 №-дээх дьиэтин туппут “Промстроймонтаж» ХЭУо дириэктэрэ Алексей Арбыкин буолар. Кини Сэбиэскэй Сойуус өрөгөйдүүр кэмигэр өр сылларга Бүлүү улууһугар производственнай-таҥар кэмбинээти салайбыт киһинэн биллэр. Кэлин улуус баһылыгын тутууга солбуйааччынан үлэлии сылдьыбыта. Итини таһынан, Дьокуускайга «САПИ» тэрилтэ салайааччытын солбуйааччынан үлэлээбитэ. Билигин Дьокуускай куоракка олорор. Бүлүү куоракка «Промстроймонтаж» ХЭУо үлэтин барытын кини уола Андрей Арбыкин үүннүүр-тэһиинниир. Тэрилтэ эдэр киһи аатыгар буолбакка, аҕаҕа сурулла сылдьар. Аны туран, Алексей Арбыкин иккис уола Артур Алексеевич Бүлүүтээҕи силиэстийэлиир кэмитиэт начаалынньыгынан үлэлиир. Тулаайахтар сайабылыанньалара ууга тааһы бырахпыт курдук сүтэн-симэлийэн хаалара өйдөнөр.
Кыбартыыраны хайдах ылла?
Т.Петрова диэн (эдэр киһини харыстаан, атын ааты суруйдубут) Бүлүү улууһун дьаһалтатын сүрүннүүр исписэлииһэ резюметыгар (интэриниэт ситимигэр баар) 2009-2012 сс. Бүлүү улууһун дьаһалтатыгар сүрүннүүр исписэлииһинэн үлэлээбит уопуттааҕын уонна өрөспүүбүлүкэтээҕи хаарбах дьиэттэн дьону көһөрүү бырагырааматын чэрчитинэн, Бүлүүгэ элбэх кыбартыыралаах 36 дьиэ сайаапкатын көмүскүүргэ үлэлэспитин ыйбыт. Онон тулаайахтарга анаан тутуллубут дьиэлэр (хаачыстыбата суох тутуллубут дьиэлэр) сайаапкаларын эмиэ кини оҥорбут буолан тахсар.
Дьаһалта үлэһитэ сайаапка докумуонун оҥорбут дьиэтиттэн кыбартыыра ылбыта интэриэһинэй. Иһэ истээх буолан тахсар. Кыбартыыраны ыларыгар Андрей Арбыкин чэпчэтии оҥордо дуу?!
Бүддьүөт үбүн көдьүүһэ суох туһаныы
Бүлүү куоракка тулаайахтарга анаан тутуллубут дьиэлэр үксүлэрэ мас тулааһыннаахтар (каркаас) уонна ону итиини тутар матырыйаалынан бүрүйбүттэр. Маннык хабааннаах дьиэлэри атыттардааҕар быдан түргэнник тутан дьэндэтэн таһаараллар. Иккиһинэн, сыаната чэпчэки, ол эбэтэр туһаныллар матырыйаал таас дьиэ киэнинээҕир быдан удамыр. Ону суоттаан көрдөххө, маннык хартыыны үөскүүр. Бүгүҥҥү күҥҥэ Бүлүү куоракка Аммосов уулуссатын 14 «б» №-дээх аадырыһыгар 24 кыбартыыралаах таас дьиэ (тутааччы — «Варламов» ХЭУо) хантараак быһыытынан 45 мөл 347 тыһ. солк уонна Октябрьскай уулуссатын 3 №-дээх аадырыһыгар 20 кыбартыыралаах мас тулааһыннаах дьиэ (тутааччы «Промстроймонтаж» ХЭУо) 30 мөл. солк тутулла тураллар. Бастакы эбийиэк 792 кв м, иккис эбийиэк 588, 33 кв м иэннээхтэр.
Таас дьиэ 1 кв м, СӨ Архитектураҕа уонна тутуу комплексыгар министиэристибэтин анал бирикээһинэн, 56 833 солк тутарга бигэргэммит. Оттон иккис мас тулааһыннаах дьиэ 1 кв м, аукцион түмүгүнэн, 51 005 солк тутуллара быһаарыллыбыт. Ол курдук, мас тулааһыннаах дьиэ уопсай иэнин (588,33 кв м) 51 005 солк төгүллээтэхпитинэ, 30 мөл. солк тэҥнэһэр. Тутууну үчүгэйдик билэр дьон этэллэринэн (бырайыагы оҥорооччулар), бу мас тулааһыннаах дьиэни тутууга иһэ үллүбүтэ 20 мөл. эрэ ороскуоттанар дииллэр. Манна өссө тутааччылар үлэлэрэ эмиэ киирэр. Ол аата бу дьиэни тутар тэрилтэ салалтата 10 мөл. солк курдугу ыраас барыһырар. Аны туран, тутууга хайдах хаачыстыбалаах маһы атыылаһан аҕалан туһаналларын көрөн турбут суох. Бүлүүгэ итинник хабааннаах дьиэни тутуспут уолаттар кэпсииллэринэн, былаахыны, хаптаһыны хатырыктыын баҕастыын уурдараллар эбит.
Дьэ, үс ый иһигэр үчүгэй барыс буолбатах дуо? Биир тылынан малтаччы этэр буоллахха, бүддьүөт үбүн көдьүүһэ суох туһаныы буолар. Маны тустаах тэрилтэлэр хасыһан, өссө дириҥник үөрэтэн, ыраас мууска таһаарыахтарын наада. Ама, бачча ыстаан бэриллибитин кэнниттэн ылсаллар ини диэн эрэх-туран саныахха.
Мин санаабар, ити сыанаҕа таас дьиэ тутуллар кыахтаах
Үөһэ этиллибит сыанаҕа тустаах бырагырааманан тулаайахтарга төһө баҕарар таас эбэтэр буруус дьиэни тутуохха сөп эбит. Дьокуускайтан Бүлүү куоракка диэри кыһыннары-сайыннары суол баар. Оннук айылаах ыраах буолбатах. Билигин Бүлүү куоракка тутулла турар таас уонна мас тулааһыннаах дьиэлэр сыаналара бэйэ-бэйэлэриттэн оннук айылаах арыта суох. Ол 5830 солк. тэҥнэһэр. Аны туран, таас дьиэ 24, мас 20 кыбартыыралаахтар. Онон ити 30 мөл. солк таас дьиэ төһө баҕарар тутуллар кыахтаах курдук. Эбэтэр буруус дьиэ ама туһаныллар кыаҕа суох дуо?
Дьиҥэр, мас эбэтэр тимир тулааһыннаах (каркаас) дьиэлэри киинтэн ыраах сытар хоту улуустарга тутуллар аналлаахтарын туһунан этиллибитэ ыраатта. Тоҕо диэтэххэ, хоту улуустарга бетон сыбаайалары, цемени тиэйии ороскуота улахана өйдөнөр. Ол иһин, ити түргэнник тутар ньыманы туһанарга күһэллэллэр. Ону чугас сытар улуустар иилэ хабан ылан, бэйэлэрин туһаларыгар анаан түргэнник тутуллар дьиэлэргэ сайаапка түһэрэллэр. Бүлүү улууһун дьаһалтатыгар бу сайаапкаларынан күүскэ дьарыктаммыт Т.Петрова (ол туһунан резюметыгар киэн туттубуттуу суруйар) дьыалата манна ыраас мууска ууруллуон сөп курдук. Ити анал сайаапкалары «көдьүүстээхтик» көмүскээбитин түмүгэр, Андрей Арбыкинтан 70 кв м иэннээх дьиэни ыһыгыннарбыт буолуон сөп. Маны эмиэ тустаах уорганнар хасыһан үөрэтэн көрөллөрө буоллар, туох эмит тыас-уус доргутуо этилэр.
Сокуону токурутан туһаныы
Бүлүү улууһун баһылыга Сергей Винокуров уонна «Промстроймонтаж» ХЭУо генеральнай дириэктэрэ Алексей Арбыкин 2012 сыл ахсынньы 2 күнүгэр 1 №-дээх эбии сөбүлэһии докумуонун түһэрсибиттэр. Онно, «О размещении заказов на поставки товаров, выполнение работ, оказание государственных и муниципальных нужд» диэн 94 №-дээх сокуоҥҥа тирэҕирэн, Бүлүү куоракка тулаайахтарга аналлаах 16 кыбартыыралаах дьиэни «Промстроймонтаж» ХЭУо тутар кэмигэр энергияны туһаммыт ороскуотун улуус бүддьүөтүттэн толуйар ис хоһоонноох докумуоҥҥа илии баттаабыттар. Ити кэнниттэн тилэх баттаһа кэриэтэ, «Промстроймонтаж» ХЭУо тулаайахтарга анаан 16 кыбартыыраны тутарыгар ититии энергиятын туһаммытын иһин «ОДьКХ» ГУП Бүлүүтээҕи «Коммунтеплосбыт» филиалга улуус бүддьүөтүттэн 395 154, 42 солк төлүүр туһунан дьаһала тахсыбыт. Онтон ахсынньы 20 күнүгэр ити сууманы коммунальнай хааһыйыстыба счетугар электроннай төлөбүрүнэн ыыппыттар. Дьиҥэр, ити сокуону токурутан, бүддьүөт үбүн сыыһа хайысхаҕа туһаныы буолар. Ол эбэтэр, ханнык баҕарар тэрилтэ туһаммыт энергиятын бэйэтэ төлүөхтээх. Эмиэ «Промстроймонтаж» ХЭУо дьиэни тутарыгар ылбыт харчытынан итиини туһаммытын сабыахтаах. Онно бүддьүөт харчыта туһаныллаахтаабыт.
P.s.: Бу дьыаланы салгыы кэтиибит.
