Социальнай ситимнэр элбээннэр, Саха сиригэр блогерство сайынна. Араас хайысханы баһылаабыт кыргыттар, уолаттар “Инстаграм” страницаларыгар бэртээхэй блогтары арыйдылар. Дьону үтүөҕэ-кэрэҕэ тардар, угуйар аҕыс блогеры билиһиннэрэбит:
@polina_micliuc — 49300 сурутааччылаах
Саха сириттэн төрүттээх Полина Румынияҕа олорор. Тас дойдуга олоруу, омуктар сыһыаннаһыыларын, бизнестэрин, экэниэмикэлэрин туһунан интэриэһинэй суруйуулары таһаарар. Сурутааччыларыгар анаан туһалаах кинигэлэри ырытан таһаарар. Полина оҕону иитии, дьиэ кэргэн иһинээҕи сыһыан, атыы-тутуу, дьиэ-уот, туһалаах сүбэлэри туһунан страницатыгар таһаарар. Олоххо туспа көрүүлээх кыыс страницатын күннэтэ үс тыһыынча киһи киирэн ааҕар, “лайктыыр”.
@tygen_ph — 23500 сурутааччылаах
Хаартыскаҕа түһэрээччи Николай уруу тэринээри сылдьар эдэр дьоҥҥо сүбэлэрин тыһыынчанан киһи ааҕар, “лайктыыр”. Уруу малааһыннарын хаартыскаҕа түһэрэр буолан, куораппыт хайа муннугар кыраһыабай сир-уот баарын, хаартыскаҕа хайдах туттан-хаптан түһүөххэ сөбүн ыйар, сүбэлиир. Маны таһынан, хаартыскаҕа түһэриинэн саҥа дьарыктанан эрэр дьоҥҥо туһалаах сүбэлэрин, бэйэтин уопутун үллэстэр.
@ikanikiforova — 15900 сурутааччылаах
Ия визажист буолан, сирэйи-хараҕы тупсаҕайдык оҥорорун таһынан, араас бүрүчүөскэни оҥорор. Онон, кэргэн тахсар, дьоро киэһээҕэ барар, фотосессияҕа сылдьар кыргыттар киниэхэ оҥортороллор. Страницатыгар сирэй-харах оҥостор малы быһаарар, туох-хайдах туттуллуохтааҕын кэпсиир. Ийэ буоларын быһыытынан, эдэр ийэлэргэ араас сүбэлэри, оҕо мала-сала, таҥаһа-саба ханна атыыланарын суруйар.
@tata_vlasyk — 10200 сурутааччылаах
Фотограф Татьяна дьону араас уобарастаан хаартыскаҕа түһэриинэн дьарыктанар. Куукула, эльф, фокусник, индеец уо.д.а. уобарастаммыт дьону кини страницатыгар көрүөххэ сөп. Биирдии хаартыската тыһыынчанан “лайк” хомуйар. Майкл Джексон, таба, Алиса, абааһы, Микки Маус буолан түһэн сурутааччыларын сөхтөрөр. Татьяна страницатын омос көрдөххө, киһи остуоруйа дойдутугар сылдьар курдук сананар.
@poryaja — 9742 сурутааччылаах
“Инстаграм” уонна “Твиттер” хонуутугар Поряжаны билбэт киһи аҕыйаҕа буолуо. Кини Инстаграмыгар күннээҕи буолбут араас күлүүлээх видеолары устар, бэйэтэ сөбүлээн көрбүт киинэлэрин, истэ сылдьар ырыаларын сүбэлиир. Маны таһынан, билигин аатыран эрэр мукбан (аһылыгы видеоҕа устуу) диэн челленджи Саха сиригэр бастакынан киллэрдэ.
@ariadna_vinokurova — 7725 сурутааччылаах
Ариадна фитнес-кииҥҥэ тириэньэрдиир. Дьону дьарыктыырын быыһыгар бэйэтин страницатыгар туһалаах сүбэлэри суруйар – спордунан сөпкө дьарыктаныы, кимиэхэ туох көрүҥ барсыан сөбүн, сөптөөхтүк аһааһын, чөл олоҕу тутуһуу о.д.а. Маныаха хас биирдии сүбэтигэр туһааннаах хаартысканы таһаарар. Киһи Ариадна страницатын аахтаҕына, спордунан дьарыктаныах, бүгүүрэтин тупсарыах санаата кэлэр.
@jekasleptsov — 6003 сурутааччылаах
Евгений сахалартан бастакынан пранк (күлүүлээх видеолар, эксперименнэр) устуунан дьарыктанан саҕалаабыта. Бэйэтэ устудьуон буолан, уопсай олоҕор, ыччат икки ардыгар буолар түбэлтэлэри устар. Маныаха киниэхэ доҕотторо көмөлөһөллөр. Бастаан видеоларын сахалыы таһаараллар этэ, кэлин нууччалыы устар буоллулар. Евгений страницатыгар таһаарбыт биир оннук видеотын 20 тыһыынча кэриҥэ киһи көрөр, араас бөлөхтөр “репостууллар” (тарҕаталлар).
@nadya_tu999 — 3851 сурутааччылаах
Надежда идэтинэн учуутал, улууска олорор. Кини дьоҥҥо олох, дьол, таптал туһунан тиэмэлэргэ сурутааччыларын кытта кэпсэтэр. Күннэтэ интэриэһинэй тургутуктары, ураты чахчылары, бөлүһүөктэр эппит муударай этиилэрин таһаарар олус интэриэһинэй страницалаах. Ону таһынан, учуутал, үөрэнээччи уонна төрөппүт сыһыаннарын, оскуолатааҕы тэрээһиннэрин туһунан тиһигин быспакка сырдатар.
Динара ЕВСИКОВА бэлэмнээтэ.
«Саха сирэ» хаһыат, edersaas.ru
