Бу күннэргэ Москваҕа оскуола иннинээҕи үөрэхтээһин үлэһиттэрин Бүтүн Арассыыйатааҕы V сийиэһэ ыытылынна. Дойду эрэгийиэннэриттэн 438 дэлэгээт кытынна. Олор ортолоругар өрөспүүбүлүкэттэн үс киһи кыттыыны ылла: СӨ Үөрэҕириигэ министиэристибэтиттэн Елена Томтосова, С.Н. Донской II аатынан үөрэхтээһин сайдыытын уонна идэни үрдэтии институтун дириэктэрин солбуйааччы Ольга Михалева, Жатайдааҕы «Василек» оҕо саадын иитээччитэ, өрөспүүбүлүкэтээҕи «Сыл иитээччитэ‒2018» куонкурус кыайыылааҕа Валентина Заболоцкая. Үһүс кыттааччы — Томтортон «Мичээрэ» оҕо саадын иитээччитэ, «Россияҕа сыл иитээччитэ» Бүтүн Россиятааҕы III куонкурус кыайыылааҕа Аркадий Афонскай.
Мэҥэ Хаҥалас Томторун «Мичээрэ» оҕо саадын иитээччитэ, «Россияҕа сыл иитээччитэ» Бүтүн Россиятааҕы III куонкурус кыайыылааҕа Аркадий Афонскай оскуола иннинээҕи үөрэхтээһин үлэһиттэрин Бүтүн Россиятааҕы V сийиэһигэр кытынна. Сийиэс аһыллыытыгар РФ Үөрэҕириигэ миниистирэ Ольга Васильева Россияҕа оскуола иннинээҕи үөрэхтээһин тэрилтэлэригэр 7 мөлүйүөн иитиллээччи баарын, ити 2012 сыллааҕы көрдөрүүттэн балтараа мөлүйүөнүнэн элбээбитин иһитиннэрдэ. Кэлиҥҥи биэс сылга сүрүн суолталаах ситиһиинэн үһүттэн сэттэтигэр диэри саастаах оҕону оҕо саадынан 100 бырыһыан хабыыга тэрээһиннэр туһуламмыттарын санатта. Россия Академиятын Оҕо аймаҕы, дьиэ кэргэни уонна иитиини үөрэтэр институтун «Няня (работник по присмотру и уходу за детьми)» идэтийии ыстандаартын бырайыага, ньээҥкэлэр социальнай статустарын үрдэтэргэ соруктаммытын иһитиннэрдэ.
Тэрээһиннэргэ маастар-кылаастар, «Россияҕа сыл иитээччитэ‒2018» Бүтүн Россиятааҕы IX куонкурус лауреаттарын дакылааттара, ырытыһар былаһааккалар, Москватааҕы оҕо саадтарыгар сиэксийэлэринэн үлэлэр итиэннэ миниистир кыттыылаах «Төгүрүк остуол» ыытылыннылар. Манна Аркадий Афонскай модератордаан иһитиннэриини оҥордо. Миниистир сүрүн болҕомтону үһүгэр диэри саастаах кырачааннары барыларын оҕо саадынан хабарга, кыра оҕолоох ийэлэр дьарыктаах буолууларыгар сөптөөх усулуобуйа тэриллиэхтээҕин, билиҥҥитэ министиэристибэ 2024 сылга диэри Российскай Федерация стратегическай сайдыытын чэрчитинэн эрэгийиэннэри кытта үлэни саҕалаабытын бэлиэтээтэ.
Ааптар: «Эркээйи» хаһыат
This post was published on 29.11.2018 13:11 13:11