«Азия оҕолоро» VI норуоттар икки ардыларынааҕы спортивнай оонньууларга Томпоттон түөрт оҕо кыттарга бэлэмнэнэр. Огородникова Евгения, Малышева Сайыына Сайдыы спортоскуолатыттан, Саһыл орто оскуолатыттан Фролкин Игорь уонна Кириэс Халдьаайы спортоскуолатыттан Гурьева Алена.
Алтыс кылаас үөрэнээччитэ Огородникова Женя 2015 с. көҥүл тустууга 2001 сыллааҕы төрүөх кыргыттарга Россияҕа бастыыр иһин көҥүл тустууга Новочебоксары куоракка 5-с миэстэ буолбута. Дьокуускай к. Павел Пинигин бирииһигэр Саха сиригэр бастыыр иһин күрэхтэһиигэ 30 кг ыйааһыҥҥа чемпионнаабыта, 8 кылаас үөрэнээччитэ Саина Малышева иккис призер буолбута. Кыргыттары Михаил Аммосов эрчийэр. «Азия оҕолоро» V спортивнай оонньууларга Сайдыы спортоскуолатын икки иитиллээччитэ кыттыбыттара. Анна Манасытова уонна Ирина Тунекова Саха сирин сүүмэрдэммит хамаандатын чилиэннэригэр баһыйтаран үрүҥ көмүс мэтээллэри ылбыттара.
Гурьева Алена буулдьанан ытыынан тренер Сергей Попов салалтатынан дьарыктанар. Кини республика араас күрэхтэһиилэригэр хаста да чемпионнаабыта. 2015 с. тохсунньуга М.М. Лукин бирииһигэр республикатааҕы турнирга Горнай оройуонун Бэрдьигэстээх с. Алена 2000 сыллааҕы төрүөх уонна онтон алын оҕолорго иккис миэстэни ылбыта. Олунньуга Аҕа дойду Улуу сэриитин кыайыы 70 сылыгар анаммыт «Кыайыы кубога» республиканскай турнирга 2000 сыллааҕы төрүөхтэргэ уонна онтон алын саастаах бөлөххө ВП-4 (391) ытан, маастарга кандидат нуорматын толорбута. Кини «Бэргэн» көрүҥҥэ маҥнайгы миэстэни ылбыта, республика рекордун олохтообута (299 очко).
1999 сыллааҕы төрүөхтэргэ уонна онтон алын саастаах оҕолорго бүтүн Россиятааҕы Кострома куоракка күрэхтэһиигэ Алена 24-с миэстэ буолбута. Балаҕан ыйыгар Дьокуускай к. «Анаабыр алмаастара» АУо бирииһигэр бүтүн Россиятааҕы күрэхтэһиигэ 2000 сыллааҕы төрүөх уонна онтон алын кыттааччыларга 386 очкону ылан чемпионнаабыта.
Алена 2016 с. тохсунньуга Ижевскай куоракка Россияҕа бастыыр иһин күрэхтэһиигэ кыттыбыта. Онно «Air-50» көрүҥҥэ Саха сирин сүүмэрдэммит хамаандатын састаабыгар киирэн 35 хамаандаттан 18 миэстэ буолбуттара, биирдиилээн күрэххэ ВП-4 көрүҥҥэ 86 кыттааччыттан 32-с буолбута.
Кулун тутар ыйга СӨ үөрэнээччилэр ортолоругар бастыыр иһин күрэхтэһии Чурапчыга ыытыллыбыта. 2001 с.т. уонна онтон эдэрдэргэ кыргыттар ортолоругар Алена Гурьева эмиэ чемпионнаабыта. Чурапчыга үөрэнэр-дьарыктанар хомуурга сылдьыбыта. Кулун тутарга бүтүн Россиятааҕы 2000 с.т. уонна онтон эдэр кыргыттарга Кострома куоракка ыытыллыбыт күрэхтэһиигэ чемпионнаабыта уонна Россия спордун маастарын нуорматын толорбута. Кини көрдөрүүтэ 409,4 очко. Онон «Азия оҕолоро» оонньууларга кыттыыны ылар Саха сирин сүүмэрдэммит хамаандатын састаабыгар киирбитэ.
Кириэс Халдьаайытааҕы ОСО-тан буулдьанан ытыы секциятын кыргыттара «Азия оҕолоро» норуоттар икки ардыларынааҕы спортивнай оонньуулар призердарынан Жегусова Иванна, Попова Вероника, Степанова Виктория буолбуттара. Кинилэр билигин Россия спордун маастардара.
Мас тардыһааччы Сергей Фролкин Россия чемпионаттарын, аан дойду Кубогын кыайыылааҕа уонна призера. Саһыл орто оскуолатын 9 кылааһын үөрэнээччитэ Игорь Фролкин Сергей быраата, эмиэ мас тардыһар. Кини республикатааҕы күрэхтэһиилэр кыайыылааҕа уонна призера. Билигин Саха сирин сүүмэрдэммит хамаандатын састаабыгар киирэн, Дьокуускай к. ыытыллар «Азия оҕолоро» оонньууларга кыттарга бэлэмнэнэр. Игорь Кэскил сэлиэнньэтиттэн бастакы бу күрэхтэһиигэ кыттар. Кини тренерэ Иннокентий Заровняев.
«Азия оҕолоро» оонньууларын уотун Кэскилгэ аҕалбыттарыгар, Игорь уоту киин уулуссанан илдьибитэ, үөрүүлээх миитиҥҥэ тыл эппитэ уонна оонньууларга чемпион буолуом диэбитэ. Сахаларга «Тыл барда – бас барда» диэн өс хоһооно баар. Биһиги Игорь Фролкин эппит тылыгар туруо диэн эрэнэбит.
