Томпо оройуонугар 30-50 сыл педагогическай ыстаастаах дьон олороллор. Кинилэр сырдыгы-үтүөнү саҕар үлэлэрэ эдэрдэргэ холобур буолар.
РСФСР оскуолатын үтүөлээх учуутала, норуот үөрэҕэриитин туйгуна Надежда Осиповна Прокопьевна, норуот үөрэҕэриитин туйгуннара Клавдия Тихоновна Сукманова, Екатерина Романовна Неустроева, Евгения Банденовна Винокурова, Ульяна Федотовна Иннокентьева, Хаандыга бөһүөлэгин Ытык олохтооҕо Маргарита Евгеньевна Власова, СР үтүөлээх учуутала Гаврил Дмитриевич Слепцов кэргэнинээн, СР үөрэҕэриитин туйгуна Мария Иннокеньевналыын улууска ытыктанар дьон.
улуустааҕы үөрэх управлениетын тэрийиитинэн бэтэрээн учууталлар остуол тула олорон көлүөнэни иитиигэ бастакы хардыыларын, оччотооҕу бииргэ үлэлээбит дьоннорун уонна үөрэнээччилэрин ахтан-санаан аастылар. Учууталлары Томпо улууһун баһылыгын солбуйааччы Петр Новгородов, үөрэхтээһин салаатын салайааччыта Саргылана Андросова уонна үөрэхтээһин салаатын салайааччытын солбуйааччы Лидия Роббек эҕэрдэлээтилэр.
Е.Р. Неустроева:
— Биһиги саҕана атырдьах ыйынааҕы учууталлар мунньахтара улахан суолталаах буолара. Учууталлар бу тэрээһиҥҥэ эрдэттэн бэлэмнэнэрбит. Орлова Анна Федоровна Томпо улууһун үөрэхтээһинин салаатын бастыҥ сэбиэдиссэйэ этэ. Кини үлэни-хамнаһы сөптөөхтүк ырытара, тыл эппитин кэннэ киһи өссө эбии кыһаллан үлэлиэн баҕарара. Билигин оҕолору иитии үлэтигэр үгүс уларыйыы киирдэ. БКЭ туһунан этэр буоллахха туох да куһаҕана суох эрээри, кэккэ уларыйыылары киллэрэр ордук. Бүгүҥҥү тэрээһин үчүгэй, улуус баһылыгын солб. П.В. Новгородовка поликлиникаҕа кырдьаҕас дьоҥҥо медицинскэй көрүүнү тэрийбитин иһин ураты махталбын тиэрдиэм этэ. Биһиги 2,5 чаас иһигэр сэттэ бырааска көрдөрөн доруобуйабыт туругун туһунан биллибит.
Е.Б. Винокурова:
— Үөрэхтээһин эйгэтигэр 50 сыл устата, онтон биир эрэ сыл Томпоттон атын сиргэ – Хабаровскай кыраайга — төрөөбүт дэриэбинэбэр үлэлээбитим. Мин биир эмэ үөрэнээччим республикатааҕы олимпиадаҕа бастыан баҕарарым. Икки үөрэнээччим үһүс миэстэни ыланнар, кинилэри быһалыы Новосибирскайга үөрэххэ ылбыттара. Рома Матящук билигин Америкаҕа үлэлиир, оттон Веста Иванова Новосибирскайга, төрөппүттэрэ кыыстарыгар көһөн барбыттара. Олег Михайлов диэн үөрэнээччим иккис миэстэ ылбытыгар миэхэ бириэмийэ быһыытынан оччотооҕуга сэдэхтик көстөр японскай таҥас лоскуйун биэрбиттэрэ куоптаҕа эрэ тиийбитэ. Олег Уфаҕа көспүтэ. Үөрэппит оҕолорбутуттан дойду киинигэр олохсуйан кыахтаахтык үлэлии-хамсыы сылдьар дьон үгүстэр, кинилэр Россия киин сиригэр биир дойдулаахтарын кытта көрсүһүүлэри тэрийэллэр, сорохтор Хаандыгаҕа кэлэ сылдьааччылар, ордук уолаттар. Эдэр специалистары өйүүр хайаан да наада, холобур, биһиги поликлиникабытыгар үчүгэй быраастар бааллар, кинилэр бэйэлэрэ бас билэр олорор дьиэтэ-уота суохтар.
Т.К. Сукманова:
— Хаандыга оскуолатын бүтэрэн баран олоҕум тухары манна үлэлээбитим. Үөрэппит оҕолорум бары билэллэр, хайаан да дорооболоһон ааһаллар, бу учуутал киһиэхэ саамай сүрүнэ буоллаҕа. 50 сыл үлэлээбитим тухары «иккини» биир эрэ оҕоҕо, охсуһууну тэрийбитин иһин, туруорбутум. Ол да үөрэнээччибин кытта көрүстэхпинэ дорооболоһобут, кэпсэтэбит. Мин 45 сааспар үөрэхтээһин туйгунун аатын ылбытым. Ону таһынан «Гражданскай килбиэн» бэлиэ туттарбыттара, ол кэнниттэн Томпо оройуонун уонна Хаандыга бөһүөлэгин Бочуоттаах олохтооҕун ааттарынан бэлиэтээбиттэрэ.
Бэтэрээннэргэ биһиги оройуоммут учууталларыгар анаммыт «Учуутал, эн аатыҥ иннигэр…» кинигэни, хартыыналары туттардылар. Бу кинигэни СР үөрэхтээһинин туйгуна, Кириэс Халдьаайытааҕы орто оскуоланы бүтэрбит, Ыҥаа орто оскуолатыгар учууталлаабыт уонна оройуон үөрэхтээһинин управлениетыгар методистаабыт Е.И. Колесова таһаарбыт. Маны таһынан бэтэрээн учууталларга эдэр специалистарга туһаайыллыбыт баҕа санааларын суруйалларыгар этии киллэрдилэр, бу суругу эһиил атырдьах ыйынааҕы учууталлар мунньахтарыгар ааҕыахтара.
