Дьокуускай куоракка буолар көҥүл тустууга Россия чемпионатыгар Саха сирин сүүмэрдэммит хамаандатыгар Томпо оройуонуттан үс бөҕөс кыттар: Виктор Лебедев, Виктор Степанов уонна Дмитрий Аксенов.
Томпо улууһун Бочуоттаах олохтооҕо, аан дойду икки төгүллээх чемпиона, Европейскай оонньуулар чемпиона, Россия биэс төгүллээх чемпиона, спорт үтүөлээх маастара, сүүмэрдэммит хамаанда капитана Виктор Лебедев Тополинай сэлиэнньэтиттэн төрүттээх. Витя кыра сылдьан Кириэс Халдьаайытааҕы оҕо спортивнай оскуолатыгар тустуунан утумнаахтык дьарыктанарын саҕалаабыта. Кэнники СӨ үтүөлээх тренерэ буолбут, кириэс халдьаайылар күтүөттэрэ Иван Дмитриевкэ эрчиллибитэ.
Улахан кыайыыларын кэнниттэн, күрэхтэһиилэрин, дьарыктарын быыһыгар Виктор дойдутугар кэлэн эдэр бөҕөстөрү, тустууну сэҥэрээччилэри кытта көрсөн барар. Холобур, төрөөбүт Тополинай сэлиэнньэтигэр буолбут табаһыттар бырааһынньыктарыгар доҕорун, Болгарияттан сылдьар аан дойду чемпиона Радослав Великовы кытта ыалдьыттаабыттара. Таба сүүрдүүтүгэр кыттыбыттара. Былырыын Виктор Кириэс Халдьаайыга үбүлүөйдээх ыһыахха кэлэн барбыта. Олохтоохтору кытта көрсүбүтэ уонна Сэбиэскэй Союз Геройа Федор Охлопков түмэлигэр сылдьыбыта. Онтон тренера Иван Дмитриев Мэҥэ Алдаҥҥа буолбут республиканскай ыччат ыһыаҕар ыҥырыллан кэлэн барбыта.
Аҕыйах хонуктааҕыта Москваҕа студеннар икки ардыларыгар тустууга Россия чемпионата буолан ааста. Саха тустуутун оскуолатыттан 20-тэн тахса спортсмен ортотугар икки Томпо бөҕөһө: ХИФУ студеннара Виктор Степанов уонна Дмитрий Аксенов кытыннылар.
65 киилэҕэ Виктор Степанов кыһыл көмүс мэтээли ылла. Кини ыйааһыныгар барыта 41 бөҕөс баара. Биһиги биир дойдулаахпыт финалга Москваттан сылдьар Тимур Алиевы кыайан чемпион буолла. Россия эдэрдэргэ чемпионатын үрүҥ көмүс уонна Европа эдэрдэргэ чемпионатын боруонса призердара өссө биир улахан ситиһиини эбиннэ. Витя Кириэс Халдьаайыттан төрүттээх. Кини СӨ үтүөлээх тренерэ Ариас Павлов иитиллээччитэ.
Дмитрий Аксенов Тополинайтан төрүттээх. Кини тустуунан Хаандыга бөһүөлэгэр утумнаан дьарыктаммыта. Бастакы тренерэ ССРС тустууга спордун маастара, СӨ хапсаҕайга спордун маастара Анатолий Андреев. Былырыын ыытыллыбыт Уһук Илиннээҕи федеральнай уокурук боруонса призера Москваҕа иккис миэстэни ылла. Кини финалга Максим Егорочкиҥҥа (Москва к.) баалынан кыайтарда. Кинилэр ыйааһыннарыгар 30 бөҕөс кииристэ.
Урут Россия чемпионатыгар кыра Томпо улууһуттан түөрт бөҕөс кытта киирсэ сылдьыбыттааҕа, онон быйыл үс тустуук кыттара соһуппат. Бу сырыыга Дьокуускай куоракка чемпионакка томполор элбэх буолан барар былааннаахпыт. 30-ча киһи ортотугар улуус баһылыга Георгий Герасимов; тренердэр Ариас Павлов, Анатолий Андреев; спорт бэтэрээннэрэ, ол иһигэр РСФСР чемпиона Егор Борисов; «Томпо илдьитэ» хаһыат спорду суруйар корреспондена Евдокия Неустроева уо.д.а. баарбыт.
Бу быһаарыылаах чемпионакка Саха сирин сүүмэрдэммит хамаандатын капитана Виктор Лебедев кыайдаҕына Рио-де-Жанейроҕа буолуохтаах олимпийскай оонньууларга кыттар кыаҕы ылыаҕа. Биһиги, томполор, биир дойдулаахтарбытыгар уонна Саха сирин бөҕөстөрүгэр барыларыгар «ыалдьарга» бэлэммит.
