Эбии үөрэхтээһин эйгэтигэр оҕо дьарыктаах буолуутугар кэнники кэмҥэ улахан болҕомто ууруллар. Кириэс Халдьаайытааҕы экология уонна биология киинэ үөрэх салалтатын анал бирикээһинэн, оройуоҥҥа оҕо туризмын сайыннарыыга координаторынан анаммыта. Олохтоох бүддьүөттэн үп көрүллэн, спортивнай ориентированиеҕа аналлаах тэрил атыылаһыллыбыта.


Кириэс Халдьаайытааҕы экология уонна биология киинин көҕүлээһининэн балаҕан ыйын 11 күнүгэр “Оҕо туризмын үөрэх тэрилтэлэригэр тэрийии” диэн сэминээр Кириэс Халдьаайы орто оскуолатын баазатыгар ыытылынна. Оройуон оскуолаларын физкултуура, ОБЖ учууталлара, тренердэрэ, кылаас салайааччылара, техникум преподавателлэрэ, төрөппүттэр кыттыыны ыллылар. Сэминээр сүрүн сыалынан оҕо туризмын сайдыытыгар уопут атастаһыыта буолла.

“Сахаагроэкотур” научнай-үөрэхтээһин киинин эбии үөрэхтээһин педагога, старшай методист Иванов Юрий Владимирович, Мэҥэ Хаҥалас улууһун хас да көлүөнэ эдэр туристарын иитэн таһаарбыт, педагогическай үлэ бэтэрээнэ Колосов Василий Антонович сэминээр практическай чааһыгар элбэх методическай көмөнү оҥордулар, лекция аахтылар, “Ocad” бырагырааманы туһанарга үөрэттилэр. “Спортивнай зал иһигэр туризм күрэҕин ыытыы” маастар-кылаас кыттыылаахтара анал каартанан оҥоһуллубут маршрутунан ориентирование күрэҕэр холоннулар, туристарга аналлаах тэрилинэн дьарыктаннылар.

 

Кириэс Халдьаайы орто оскуолатын физкультураҕа уонна ОБЖ предметигэр учуутала Иван Арсентьевич Тарабукин бу сайын Дьокуускайга ыытыллыбыт Арассыыйаҕа эбии үөрэхтээһин төрүттэммитэ 100 сылыгар аналлаах өрөспүүбүлүкэтээҕи турслекка ситиһиилээхтик кыттыбыттарын туһунан кэпсээтэ. Оскуола педагогическай кэлэктиибэ экология уонна биология киинин кытта ыкса сибээстээхтик үлэлиир. Наставник Ефимов Прокопий Прокопьевич көмөтүнэн элбэх үлэ ыытыллар. Инникитин оройуон сүүмэрдэммит хамаандатын хомуйан, турслекка кыттарга этии киирдэ. Мунньахха дьон бэйэтин санаатын эттэ. Арассыыйаҕа 2019 сылга Оҕо туризмын сылынан сибээстээн, оройуон оскуолаларын икки ардыгар күрэхтэһии тэрийэргэ, оскуола аайы оҕо туризмын сайыннарыыга эппиэтинэстээх дьону аныырга диэн этиилэр киирдилэр.

Сэминээр кыттыылаахтарыгар өрөспүүбүлүкэтээҕи агротехнологическай үөрэхтээһин, экоголия уонна туризм киинин туоһу суруга туттарылынна. Томпо оройуонугар оҕо туризмын сыйдыытыгар элбэх баҕа санаа этилиннэ. Ыраахтан кэлбит ыалдьыттарга өйдөбүнньүк бэлэх, махтал сурук ананна.

Ааптар: Елена ВИНОКУРОВА, «Томпонский вестник» хаһыат, Ulus.Media сайт

0
0
comments powered by HyperComments