Томпо улууһун уонна ХИФУ салалталарын икки ардыгар үөрэххэ, үлэҕэ, наука эйгэтигэр, спортка уонна культураҕа бииргэ үлэлииргэ сөбүлэһии түһэриллибитэ. Ол чэрчитинэн Дьокуускайга университет ректора Евгения Михайлова, оройуон депутаттарын бэрэссэдээтэлэ Илья Шадрин, үөрэх тэрилтэлэрин салайааччылара, быйыл диплом ылар студеннар кыттыылаах мунньах буолбута.
Мунньахха 16 салайааччы кыттыбытыттан ХИФУ хайа факультетын декана Борис Заровняев, геолого-разведочнай факультет декана Борис Попов, инженернэй-техническэй институт директора Терентий Корнилов бааллара кэрэхсэбиллээх.
Томпо улууһуттан төрүттээх быйыл үөрэҕин бүтэрэн специалист буолар 44 студент уонна 4 атын улуустан сылдьар студент кэлбиттэр. Кинилэр талар идэлэрэ араас: инженер, учуутал, иитээччи, эмчит, юрист, экономист. Оннооҕор регионовед уонна архивист диэн сэдэх идэни ылыахтаах эдэр дьон эмиэ бааллар. Ол эрээри кинилэр бары тутуспутунан төрөөбүт улууспутугар сибилигин үлэлии тиийэбит диэн эппэттэр. АӨардара салгыы үөрэнэр санаалаах. Кэлиэн баҕалаахтар үксүлэрэ үчүгэй усулуобуйалаах улуус киинигэр олоруохтарын уонна үлэлиэхтэрин баҕараллар. Дьиэ, хамнас, сибээс аныгы көрүӨнэринэн хааччылыы туһунан ыйыталаһаллар.
Оройуон депутаттарын бэрэссэдээтэлэ Илья Шадрин:
— Мин үөрэхтэрин бүтэрээччилэр ортолоругар инженердэр баалларыттан үөрдүм. Ол курдук 12 студент бу идэни талан специалист буолан диплом ылыахтара. Кинилэр истэригэр геофизиктар, технолог уонна химик бааллар. Биһиги курдук промышленнай улууска олус туһалаах идэлэр. Олохтоох ыччат, сахалар, ылсан үлэлиэхтээхтэр. Холобура, билигин Дьабарыкы Хайа шахтатыгар отдел начальнигын солбуйааччытын үлэтэ баар. Биһиги улууска 73 үлэ миэстэтэ аһыллыбыта, ол иһигэр 38 учуутал, 13 эмчит. Тыа хаһаайыстыбатыгар 20 үлэ миэстэтин арыйдыбыт. 10 табаһыт, зоотехник, бухгалтер, агроном, технологтар ирдэнэллэр.
Маны таһынан ХИФУ уонна Хаандыгатааҕы хайа-геологическай техникум салгыы бииргэ үлэлээһиннэрин туһунан кэпсэтии барда. Ол курдук улууска баар геологическай полигон сиригэр икки үөрэх тэрилтэтин студеннара практикаланыахтара. Билигин университекка техникуму бүтэрбит сэттэ студент үөрэнэр. Евгения Исаевна кинилэр билиилэрин таһыма үчүгэйин бэлиэтээтэ.
Атырдьах ыйыгар Хаандыгаҕа улууцс юбилейынан сибээстээн улахан экономическай форум буолуохтаах. Онно ХИФУ эмиэ кыттыа уонна көмөлөһүө.
