Томпо улууһун Хаандыгатыгар билигин дьон быыбардыыр учаастактарга кэлэ тураллар. Кинилэри кытта СИА уопсастыбаннай кэрэспэдьиэнэ кэпсэттэ.
Александр Аянитов:
— Мин кэргэммин кытта куоластыы кэллим. 31 саастаахпын. Оройуон айылҕа харыстабылын инспекциятыгар үлэлиибин. Быыбардарга урут да син кыттар этим, бу сырыыга олох-дьаһах сайдарыгар туһалаах буолуо диэн саныыбын. Бүтэһиккэ диэри кими таларбын толкуйдаатым, сөптөөх быыбары оҥордум диэн саныыбын.
Николай Решетников:
— 24 саастаахпын. Полицияҕа сибээс инженеринэн үлэлиибин. Партията суохпун. Үс киһиэхэ тэҥинэн куоластаатым. Мин куолаһым, баҕар, быһаарыылаах буолуо дии. Саха сиригэр онтон-мантан кэлбит дьон сири мээнэ ылыан баҕарбаппын, оттон улууска оптоволокно сибээһэ түргэнник кэллэр диэн баҕалаахпын.
Маргарита Евгеньевна Владсва:
— 77 саастаахпын. Үлэ бэтэрээнэбин, сэрии оҕотобун. Манна 1962 сыллаахха Курганскай уобаластан САССР үөрэхтээһинин министертсвотын ыҥырыытынан кэлбитим. Үйэм тухары оҕо уһуйааныгар иитээччинэн үлэлиибитим, билигин «Алроса» КСК-ҕа харабылбын. Хаандыга бэтэрээннэрин сэбиэтин бэрэссэдээтэлэбин. Республика хаһыатын ааҕабын. Галина Данчикова туһунан элбэхтик суруйаллар. Үлэһит, дьон туһугар кыһаллар, соторутааҕыта оройуоммутугар вертолетунан көтөн кэлэ сылдьыбыта элбэҕи этэр. Юрий Куприянов улахан былакаата биһиги «Алроса» КСК- гэр ыйанан турар, мээнэ киһини былакаакка таһаарбатахтара буолуо. Ол иһин толкуйдаан баран бэйэм куоласпын дьоһуннаах дьоҥҥо биэрдим. Ким дьокутаат буолбут хамнас улаатарын туруорсаллара буоллар, биэнсийэбит да кыра, ол эрээри миэхэ син тиийэр. Оттон 3-4 оҕолоох эдэр дьон 13 тыһыынча хамнастаахтара сыыһа. Үлэ бэтэрээнигэр көмө көрүллэр буоллаҕына сэрии оҕотугар суох буолуохтаах. Иккиттэн бииригэр бэриллэрэ ордук.
Иван Афанасьев:
— Мин «Биир ньыгыл Россия» партия Томпотооҕу салаатын сэкирэтээрэ, улуус баһылыгын 1-кы солбуйааччы буолабын. Биһиги улууспутугар үс учаастак үлэлиир. Хаандыга бөһүөлэгэр улуус киинин, Дьабарыкы Хайа бөһүөлэгин, Сайдыы, Тополинай, Теплай Ключ, Развилка, Охотскай Перевоз сэлиэнньэлэрин дьоно, Кэскилгэ олохтоохтор бэйэлэрэ уонна Кириэс Халдьаайы сэлиэнньэтигэр олохтоохтор, Мэҥэ Алдан, Арыы Толоон уонна Ударник сэлиэнньэтин дьоно быыбардыыллар. Тэрээһин үчүгэй, ол эрээри Кириэс Халдьаайыга сибээс уонна Интернет суох, онон Бүтүн Россиятааҕы порталга бэйэлэрэ кыайан быһа тахсыбаттар. 3 чаас буола-буола куоластааһын хаамыыта биллэр. Дьон көхтөөхтүк кыттар. Билиҥҥитэ Хаандыгаҕа 491, Кэскилгэ 93, Кириэс Халдьаайыга 247 киһи куоластаата. Улууска барыта 831 киһи буолла.
