Томпо оройуонугар СӨ культураҕа уонна духуобунай сайдыыга миниистирэ Владимир Тихонов, СӨ государственнай филармониятын директора, дирижер, СӨ искусствотын үтүөлээх үлэһитэ, Хаандыга бөһүөлэгин Бочуоттаах гражданина Наталия Базалева сырыттылар.
Улуус баһылыга Георгий Герасимовы кытта Байаҕантай нэһилиэгин культураҕа объектарын көрдүлэр, култуура үлэһиттэрин уонна уопсастыбаннаһы кытта көрүстүлэр.
Биһиги оройуоммут Саха сирэ уонна Россия култуурата уонна искусствота сайдарыгар элбэх кылааты киллэрбитэ уонна киллэрэр. Ол курдук Кириэс Халдьаайыттан балет артыыһа, САССР үтүөлээх артыыһа Лаврентий Мекюрдянов, ССРС государственнай бириэмийэтин лауреата, СӨ народнай артыыһа Ефим Степанов, Россия үтүөлээх худуоһунньуга Мария Рахлеева, СӨ искусствотын үтүөлээх үлэһитэ, худуоһунньук Михаил Старостин уо.д.а. Томпоттон төрүттээхтэр.
Киинэ искусствотыгар саха народнай суруйааччыта Егор Неймохов «Хара мааска» сценарийын суруйан киирбитэ. Онтон кини сценарийдарынан Аҕа дойду сэриитигэр анаммыт «Ильмень үрдүнэн туруйалар» уонна «Сайсары күөлгэ» детектив киинэлэр уһуллубуттара. Билигин улуус култууратын начальнигынан үлэлээн эрэр Александра Скрябина хас да киинэҕэ уһуллубута. Мэҥэ Алдантан төрүттээх Айталина Лавернова эмиэ киинэҕэ уһуллар. Хандыга б. эдэр режиссер Никита Новгородов хас да киинэни уһулла: «Суруллубатах сокуон», «Атын суол», «Ситим», «Умнар бырааппыт суох».
Сыл бэлиэтин – чороону — улуус баһылыга Георгий Герасимовка туттардылар.
