29 Кулун тутар 29.03
  • -13°
  • $ 92,26
  • 99,71

Токиоҕа ыытыллар Олимпиадаҕа бэлэмнэнэр спортсменнар испииһэктэригэр кимнээх киирдилэр?

14:42, 16 декабря 2016
Текст:
Читайте нас на
Яндекс Новости
ЯДВ

Саха сиринээҕи спорт министиэристибэтин коллегията Олимпиадаҕа, Паралимпиадаҕа, Сурдлимпийскай оонньууларга бэлэмнэнии бырагыраамаларыгар хайа спортсменнар киирэллэрин бигэргэттэ. Бу испииһэккэ спорт кыһыҥҥы уонна сайыҥҥы көрүҥнэригэр уопсайа 17 атлет киирдэ.


Спорт кыһыҥҥы көрүҥэригэр Олимпиада чөмпүйүөнэ, кэлиҥҥи сылларга Алдаҥҥа дьарыктанар Никита Крюков баар.

2020 сыллааҕы Олимпиадаҕа бэлэмнэнэр спортсменнар ахсааннарыгар көҥүл тустууга Азия чөмпүйүөнэ Айаал Лазарев, көҥүл тустууга устудьуоннар ортолоругар аан дойду чөмпүйүөнэ, Арассыыйа икки төгүллээх призера Виктор Рассадин, көҥүл тустууга аан дойдуга бастыыр иһин күрэхтэһии кыайыылааҕа Алексей уонна Петр Копыловтар, боксаҕа Арассыыйа икки төгүллээх чөмпүйүөнэ Василий Егоров, боксаҕа Арассыыйаҕа бастыыр иһин күрэхтэһии кыайыылааҕа Айтал Дьяконов, чэпчэки атлетикаҕа Арассыыйа сүүмэрдэммит хамаандатын састаабыгар киирэ сылдьар Сардаана Трофимова бааллар.

«Тустууктар Егор Пономарев уонна Ньургун Скрябин тустарынан этэр буоллахха, кинилэр Олимпиадаҕа киирбэт ыйааһыҥҥа тусталлар. Виктор Лебедев билигин чөлүгэр түһэр тэрээһиннэргэ сылдьар, салгыы тустарын дуу, тустубатын дуу туһунан биллэрэ илик. Ити тренердэриттэн уонна бэйэтиттэн тутулуктаах. Салгыы тустар санаалаах буоллаҕына, бырагыраамаҕа киллэрэн биэриэхпит», — диир үрдүкү спортивнай мастарыстыба оскуолатын дириэктэрэ Александр Игнатьев.

Саха сирин вице-премьерэ Михаил Гуляев охчут Кристина Тимофееваны, Розалина Тимофееваны, ону таһынан хайыһарга эдэрдэр Европатааҕы олимпийскай фестивалларын чөмпүйүөнүн Александр Клугены эбии киллэрэн биэрэргэ эттэ.

Паралимпийскай оонньууларга бэлэмнэнии бырагырааматыгар пауэрлифтиҥҥа аан дойду чөмпүйүөнэ Владимир Балынец, оҕунан ытыыга аан дойду чөмпүйүөнэ Степанида Артахинова, олорон эрэ волейболга Европа чөмпүйэнээтин үрүҥ көмүс призера Алена Дмитриева бааллар.

Сурдлимпийскай бырагыраамаҕа дойду чөмпүйэнээтин кэнниттэн Арассыыйа сүүмэрдэммит хамаандата быһаарыллар. Бэлэмнэниигэ киирдилэр: дойду элбэх төгүллээх чөмпүйүөнэ Сергей Николаев, Европа чөмпүйэнээтин үрүҥ көмүс призера Владимир Бородин, Арассыыйа икки төгүллээх чөмпүйүөннэрэ Валерий Чемпосов уонна Василий Стрекаловскай.

Буулдьанан ытыыга бэлэмниини ааһарга киирдилэр: аан дойду чөмпүйүөнэ Евдокия Каторгина, дзюдоҕа аан дйоду чөмпүйэнээтигэр боруонса мэтээли ылбыт Григорий Басыкатов.

Сурдлимпийскай оонньуулар эһиил Турциҕа ыытыллаллар.

Спортсменнар хайдах кытталарыттан көрөн испииһэк уларыйар.

Следите за самым важным и интересным в Telegram-канале и WhatsApp-группе ЯСИА