«Саҥа дьиэ» оҕолорго көмөлөһөр аһымал пуонда бэйэтин суотугар Саха сиригэр үөрэх комплексын тутар былааннаах. Бу туһунан Ил Дархан уонна пуонда Иркутскайга түһэрсибит сөбүлэҥ суруктарыгар этиллэр, өрөспүүбүлүкэ салайааччытын пресс-сэкирэтээрэ Афанасий Ноев иһитиннэрдэ.
«Сөбүлэҥҥэ олоҕуран, аһымал пуондата Саха сиригэр бэйэтин суотугар «Точка будущего» үөрэх комплексын тутуоҕа. Маннык комплекс Иркутскайга үлэлиир. Техническай өттүнэн толору хааччыллыбыт, бырагыраамаларыгар аныгы информационнай технологиялар баһылыыллар. Манна үлэлиир исписэлиистэр инники күөҥҥэ тутуллар уопуттара уонна бастыҥ көрдөрүүлээх үлэлэрэ биһиэхэ холобур буолуохтара», – диэтэ Афанасий Ноев.
Саха сирин бырабыыталыстыбата комплекс тутуутугар сир биэриэҕэ уонна инфрастурктуратын оҥорууга көмөлөһүөҕэ.
Айсен Николаев бэлиэтээбитинэн, маннык үөрэх тэрилтэтин тутуу бизнес социальнай эппиэтинэһигэр үтүө холобур буолар. «Точка будущего» комплекс дьыссааттаах, оскуолалаах, үчүгэй инфраструктуралаах, үөрэх мадьыаллаах, инникигэ көҕүлүүр күүһэ улахан.
