Тиксии бөһүөлэгэр Советскай Союз геройа Федор Попов 95 сылыгар анаммыт «Снежный барс» байыаннай-спортивнай күрэх буолан ааста.
Оҕону Ийэ дойдутун иннигэр бэриниилээх буоларыгар, Россия историятын, армия олоҕун билэригэр анаммыт күрэхтэһиигэ Тиксиитээҕи 1, 2 нүөмэрдээх орто оскуолалар, Арктикатааҕы гимназия уонна Быыкап орто оскуолатын үөрэнээччилэрэ кыттыыны ыллылар. Оҕолор хамаандалар хаамыыга, АК-74 аптамааты ыһыыга, таҥыыга күрэхтэстилэр.
Спортивнай курэххэ уолаттар күүстэрин-кыахтарын бэрэбиэркэлэннилэр. Бу көрүҥҥэ Арктикатааҕы гимназия үөрэнээччитэ Руслан Иванов бэйэтин кыанарын толору көрдөрдө. Кыргыттарга ис былчыҥын хачайдааһыныгар Татьяна Семивеличенко тэҥнээҕин булбата. Сүүрүүгэ куоталаһыыга хамаанданан үлэлээһини көрдөрдүлэр. Быһый атахтаахтарынан Арктикатааҕы гимназия оҕолоро буоллулар. Бүтэһик түһүмэҕинэн саамай күүрүүлээх, киирсиилээх байыаннай эстафета буолла.
Түмүккэ маҥнайгы миэстэни Арктикатааҕы гимназия, иккис – Тиксиитээҕи маҥнайгы оскуола уонна үһүс бочуоттаах миэстэҕэ Быыкаптааҕы орто оскуола таҕыстылар.
