19 Кулун тутар 19.03
  • -9°
  • $ 91,98
  • 100,24

Тэрээһин үлэни күүһүрдэр сорук туруорулунна

Читайте нас на
Яндекс Новости
ЯДВ

Атырдьах ыйын 5 күнүгэр Бүлүү куоратыгар бырабыыталыстыба Бүлүү, Үөһээ Бүлүү улуустарыгар оттооһун хаамыытын, туох кыһалҕа баарын билсэр 3 бөлөҕүн салайааччыта, Эдэр ыччат уонна дьиэ кэргэн политикатыгар министр Афанасий Владимиров, тыа хаһаайыстыбатын министиэристибэтин эппиэттээх үлэһиттэрэ кыттыылаах оттооһуҥҥа сүбэ-мунньах ыытылынна.

Улуус дьаһалтатын баһылыгын бастакы солбуйааччы Василий Лукин Мастаах түөлбэтиттэн ураты улуус бары нэһилиэктэрин кэрийэн оттуур сирдэрин көрбүттэрин, баһылыктары кытта үлэлэһэ, балаһыанньаны билэн, быһаара олороллорун иһитиннэрдэ.

Улуустааҕы тыа хаһаайыстыбатын департаменын салайааччы Иван Тарасов сүөһү аһылыгын бэлэмнээһиҥҥэ уустуктар баалларын, өрүс бэтэрээ өттүгэр от үүнүүтэ мөлтөҕүн, өрүс уҥуор ууга барбыттарын бэлиэтээтэ, өрүс уҥуор сытар Күүлэт түөлбэтин нэһилиэктэрэ ууну түһэрэр ханааллары ыраастааһыҥҥа өрөспүүбүлүкэттэн эбии үбүлээһини туруорсалларын иһитиннэрдэ.

Кини улуус 28 тыһ. т оту оттуур былааннааҕыттан айылҕа кубулҕаттарыттан 69 эрэ бырыһыанын бэлэмниэҕин, 8 тыһ. т от тиийбэтин, онон 1170 т оту, 200 т сенаһы, 1000 т комбикорманы, 300 т туорахтаах фураһы атыыластахтарына сүөһүлэрин дьыл таһаарыахтарын эттэ. Нэһилиэктэргэ страховой оту бэлэмнииргэ сорук тиэрдиллибитин, барыта 2400 т страховой оту кэбиһиэхтэрин, мобильнай этэрээттэр тэриллиэхтэрин, 2100 т оту ким оттуура быһаарыллыбытын, 300 т оту улуус таһыгар оттуохтарын, былырыыҥҥы 500 т курулаабыт от баарын, 800 т сенаж, 500 т сиилэс бэлэмнэниэҕин аҕынна.

Чернышевскай нэһилиэгин баһылыга Артур Протопопов, Бороҕон баһылыга Андрей Иванов, Тааһаҕар баһылыга Семен Каратаев, Өкүндү баһылыгын эб. толорооччу Семен Протопопов, Бөкчөкҥөө баһылыга Иван Евсеев уо.д.а. оттооһуҥҥа балаһыанньа уустугун бэлиэтээтилэр, көмө оҥоһулларын туруорустулар.

Улуус дьаһалтатын баһылыгын бастакы солбуйааччы Василий Лукин дьон оттооһунтан туора турбатын, министиэристибэ отчуттарга кэмигэр көмө оҥорорун, мелиорацияҕа былааны таһынан үлэҕэ үбүлээһин наадатын бэлиэтээтэ.

Министиэристибэ аска-үөлгэ департаменын салайааччыта Андрей Андреев Бүлүү улууһун элбэх нэһилиэгин ходуһаларыгар сылдьыбытын, от үүнүүтэ мөлтөҕүн, хаалбыт кэмҥэ тэрээһин үлэни күүһүрдэри, мобильнай биригээдэлэри ыраах ыытан оттотору, ханна да балаһыанньа уустугунан атын улуустартан от атыылаһарга, оттуурга санамматтарын эттэ.

Тыа хаһаайыстыбатын уонна ас-үөл политикатыгар министри солбуйааччы Семен Потапов министиэристибэ оттооһуҥҥа көмө оҥорорун, ол курдук улуустарга мобильнайдары тэрийэргэ субвенция бэриллибитин, босхо туус биэриитэ көрүллүбүтүн, хаалбыт кэмҥэ оттооһуну тэрээһиннээхтик ыытарга туох-баар кыаҕы-күүһү түмэри эттэ.

Бүлүү улууһун куратора, Эдэр ыччат уонна дьиэ кэргэн политикатыгар министр Афанасий Владимиров оттооһуҥҥа Саха сирин үрдүнэн 24 улууска уустук балаһыанньа үөскээбитин, балаһыанньаны билсэ бырабыыталыстыба 11 группа тэрийэн ыыппытын, Бүлүү ходуһаларыгар күргүөмнээх үлэ бара турарын, мобильнай биригээдэлэр техникэлэрин уматыгар бүлүүлэргэ 2.4 мөл. солк көмөлөспүттэрин, оттооһуҥҥа студеннар тутар этэрээттэрэ кыттыахтарын сөбүн этэн туран, көмөнү кэтэспэккэ, оттооһуну тэрээһиннээхтик ыытарга сорук туруорда.

Следите за самым важным и интересным в Telegram-канале и WhatsApp-группе ЯСИА