Отчуттары ДьТХТ дириэктэрэ А.П.Самсонов, тыа хаһаайыстыбатын миниистирин э.т. А.П.Атласов, ТХМ сиртэн үүнүүнү ылыыга уонна материальнай-техническэй хааччыйыыга департаменын салайааччыта В.В.Чичигинаров атаардылар.
Уолаттар тиистэригэр тиийэ сэбилэниилээхтэр: биэс МТЗ-82 уонна “Синтай” тыраахтардаахтар, олорго иккилии ротор от оҕустарар уонна мунньар сэптээхтэр, икки пресс-подборщиктаахтар. Тыа хаһаайыстыбатын механизациялааһын идэтигэр үөрэнэр үһүс куурус устудьуоннарын техникум производственнай үөрэхтээһиҥҥэ маастара Иван Никандрович Исаков уонна тырахтарыыс Геннадий Иванович Ломакин салайан-такайан үлэлэтиэхтэрэ.
Бастакы механизированнай биригээдэҕэ 5 уол оттуо. Кинилэри эмиэ 5 устудьуонтан турар иккис биригээдэ атырдьах ыйыттан солбуйуоҕа. Техникум устудьуоннара 600 туонна оту бэлэмниир былааннаахтар. Отчут уолаттар оһоҕунан уонна электрогенераторынан хааччыллыбыт балааккаҕа хоно сылдьыахтара. Техникум салалтата аһынан-үөлүнэн, үлэҕэ туттуллар тэрилинэн толору хааччыйар. Оҕо эрдэхтэриттэн от-мас үлэтигэр эриллэн улааппыт тыа сирин ыччаттара үөрэххэ ылбыт билиилэрин хара үлэҕэ чиҥэтэн, өҥ сайын быйаҥыттан өлгөмнүк сомсоллоругар техникум уонна хаһаайыстыба салайааччылара бүк эрэнэллэр.
Василий НИКИФОРОВ, «Саха сирэ» хаһыат, edersaas.ru
СИА.
