СӨ бырабыыталыстыбатын 2020 сыллааҕы үлэтин отчуоттуур мунньаҕар Тамалакаан нэһилиэгиттэн, Zoom нөҥүө холбонон, уопсайа 25 киһи кытынна. Баһылык Пётр Иванов нэһилиэк сайдыытыгар боппуроустары туруорда.
Тамалакааҥҥа ыччат агро-бөһүөлэгин 46 учаастагар гаас ситимин тардыы боппуруоһа баар. Бу бөһүөлэк 27 учаастага элбэх оҕолоох эдэр ыалга бэриллэн, нэһилиэк инники сайдыытыгар төһүү күүс буолуоҕун баһылык Петр Иванов иһитиннэрдэ. Салгыы «Роспотребнадзор» ирдэбилигэр эппиэттиир ыраас иһэр уу ылар сир суоҕунан, уу ыраастыыр ыстаансыйа тутуллуон наадатын этиннэ.
«Тамалакаан нэһилиэгинэн ааһар «Бүлүү» федеральнайдааҕы трассаны аспааллааһын «Бүлүү» суол управлениетын бырайыагар киллэриллэрэ наада«, — диэн нэһилиэнньэ өссө биир туруорсуутун иһитиннэрдэ.
Ааспыт 2020 сылга Тамалакааҥҥа элбэх үлэ барда. Саҥа оскуола-саад тутуута саҕаланна, бу сыл күһүнүгэр үлэҕэ киирэрэ былааннанар. Уопсай быраактыка бырааһын дьиэтэ бэрт тэтимнээхтик аҕыйах ый иһигэр тутуллан, үлэлии турар. Олохтоох көҕүлээһиннэри өйүүр бырагырааманан бөһүөлэк сүрүн уулуссата оҥоһулунна, спортивнай былаһаакка үлэлээтэ, диэн Үөһээ Бүлүү улууһун дьаһалтатын инстаграм-сирэйигэр Рената Ботуева суруйда.
