Поэт Ефрем Сивцев-Таллан Бүрэ төрөөбүтэ 109 сылын көрсө кини аатын сүгэр Бөтүҥ орто оскуолатыгар анал стипендия туттардылар.
Үөрүүлээх тэрээһиҥҥэ саха народнай поэта, Саха сирин суруйааччыларын сойууһун бэрэссэдээтэлэ Наталья Харлампьева, поэт, кириитик, П.А.Ойуунускай аатынан судаарыстыбаннай бириэмийэ лауреата Николай Винокуров — Урсун, Нам улууһун баһылыгын солбуйааччы Инна Сивцева, Бөтүҥ нэһилиэгин баһылыга Михаил Макаров, Таллан Бүрэ оҕолоро, аймахтара, нэһилиэк олохтоохторо кыттыыны ыллылар.
Быйылгы стипендия хаһаайынынан Бөтүҥ орто оскуолатын 11-с кылааһын үөрэнээччитэ Алеша Марков буолла. Анал стипендияны Таллан Бүрэ улахан уола Тит Сивцев туттарда. Санатан эттэххэ, бу стипендия быйыл сүүрбэ бэһис төгүлүн туттарыллар.
Аҕатын туйаҕын хатарбыт Россия суруйааччыларын сойууһун чилиэнэ, прозаик Степан Сивцев – Хамалҕа Таллан Бүрэ аатын үйэтитиигэ үлэлэһэр дьоҥҥо аймахтар ааттарыттан махтанан туран: “Аҕабыт эһиил төрөөбүтэ 110 сылын туолар. Ону сэргэ 2019 с. Намҥа Олоҥхо ыһыаҕа ыытыллыахтаах. Онон бу тэрээһиннэри тэҥҥэ дьүөрэлээн былааннаах үлэни ыытыахпытын баҕарабыт”, — диэн иһитиннэрдэ.
Таллан Бүрэ оҕолоро, сиэннэрэ, аймахтара аҕаларын аатын үйэтитиигэ стипендия туттарыытынан эрэ буолбакка, музей материальнай базатын хаҥатыыга эмиэ үлэлэһэллэр.
Ыспыраапка:
Ефрем Степанович Сивцев – Таллан Бүрэ тохсунньу 25 күнүгэр 1909 с. Нам улууһугар төрөөбүтэ. 1932 с. Саха Сиринээҕи уобаластааҕы сэбиэскэй партийнай оскуоланы бүтэрбитэ. Айымньылара 1929 с. бэчээттэнэллэр. Бастакы кинигэтэ 1937 с. тахсыбыта. 1944 с. ССРС суруйааччыларын сойууһун чилиэнэ. РОНО сэбиэдиссэйинэн, инспекторынан, саха тылын уонна литературатын учууталынан үлэлээбитэ. Кини аатын билигин Нам улууһун Бөтүҥ орто оскуолата сүгэр. Төрөөбүт нэһилиэгэр кини аатынан музей баар.
