Аҕыйах хонуктааҕыта «Хивус» суудуналаах урбаанньыттар икки пассажир 2000-лыы солкуобайы төлөөбөтөхтөрүн иһин, суудунаттан түһэримээри гыммыттара иһиллибитэ…
«Хивустаах» урбаанньыттары кытары тырааныспар уонна сыана бэлиитикэтин кэмитиэтин «сэриилэрэ» бүтэ илик. Аны бу сырыыга СӨ бастакы вице-премьерэ, экономика миниистирэ Алексей Стручков салайааччылаах мунньахха урбаанньыттары кытта көрүстүлэр. Мунньахха сыана кэмитиэтин бэрэссэдээтэлэ Антонина Винокурова, тырааныспар миниистирэ Семен Винокуров кытыннылар.
Мунньахха тарыып тула ирэ-хоро кэпсэтэн баран, урбаанньыттар уопсай мунньахтарын ыытар туһунан быһаардылар. Итиэннэ тарыып эрдэ бигэргэтиллибитин курдук, улахан дьоҥҥо 1000 солк., оҕолорго 500 солк. хааларын туһунан быһаардылар.
Ыам ыйын 12 күнүттэн Сыана бэлиитикэтин кэмитиэтин исписэлиистэрэ гражданнартан киирбит үҥсүүлэринэн хонтуруоллуур, бэрэбиэркэлиир үлэни ыытыахтара.
