Сыл аайы СӨ Ыччат дьыаларыгар уонна дьиэ кэргэн бэлиитикэтигэр министиэристибэтэ социальнай, экономическай өттүнэн сайдыыга грант ыларга куоҥкурус биллэрэр. Табалаах нэһилиэгин дьаһалтата былырыын ити куонкуруска «Создание мини бизнес инкубатора в наслеге» бырайыагынан кыттыбыта. Ол түмүгүнэн, «Организация бытовых услуг» анал аакка кыайыылааҕынан тахсан, үбүлэнэр чиэстэммитэ.
«Министиэристибэ грана икки хайысхалааҕа: бытовой өҥөнү тэрийии уонна олохтоох оҥорон таһаарыы. 2017 сыллаахха грант бастакы хайысхатыгар «Табалаах нэһилиэгэр дьоҕус бизнес инкубаторы тэрийии» бырайыагынан кыттаммыт, грант ылан турабыт. Нэһилиэнньэ уопсастыбаннай олоххо кыттыгастаах, дьарыктаах буоларын туһугар суруллубут, оҥоһуллубут бырайыак буолар. Бу дьыл кулун тутар 17 күнүгэр дьоҕус бизнес инкубатор үөрүүлээх арыллыыта буолбута. Бэлиэ түгэҥҥэ СӨ Урбааҥҥа уонна инвестиционнай сайдыыга миниистирэ А.А. Сафронов ыалдьыттаан барбыта. Оройуоннааҕы урбаанньыттары өйүүр пуондатын нөҥүө министиэристибэттэн кэлэн, үлэһиттэргэ маастар кылаас ыытыахтара диэн эрэннэрбитэ. Өссө биир үөрүүлээҕэ диэн бизнес инкубатор Дьарыктаах буолуу сылыгар сөп түбэһэн арылынна», — диэн кэпсээтэ бырайыак ааптара, нэһилиэк баһылыга Анна Вениаминовна Рожина.
Үс хостоох кыбартыыраны уларсан, ону өрөмүөннээн дьоҕус бизнес инкубатор дьиэтин тэрийбиттэр. Манна түөрт хостоох көстүүнэй, иистэнэр хос, парикмахерскай, дьоҕус хаартыска устуудьуйата үлэлиэхтээх. Дьиэ хаһаайкатынан Клавдия Христофоровна Попова анаммыт.
