Табалаахтааҕы «Илгэ» бэтэрээннэр түмсүүлэрин Светлана Христофоровна Борисова салайар. Кини Улуу Кыайыы 75 сылын көрсө олохтоох тыыл бэтэрээннэрин тустарынан өр кэмҥэ муспут матырыйаалларынан кинигэ таһаартарарга үлэлэһэр.


Табалаах бэтэрээннэрин лидерэ Светлана Борисова кэлэр сылга гражданскай сэрии кыттыылааҕа Мария Потапова төрөөбүтэ 120 сылын туоларын кэпсиир. Киниэхэ анаан эмиэ кинигэ таһаарар баҕалааҕын этэр. Историянан интэриэһиргиир Христофоровна өссө оскуолаҕа үөрэнэр эрдэҕиттэн Маша Потапова туһунан сэргээбит:

— Табалаах оскуолатын пионерскай дружината Маша Потапова аатын сүгэрэ, бастың үөрэнээччилэр кини олорбут паартатыгар олорор чиэскэ тиксээччилэр. Кэлин, улаатан бараммын, Маша Потапова бүтэһик күнүгэр диэри олорбут уонна көмүллүбүт сиригэр Үөһээ Бүлүү Далырыгар тиийэ сылдьыбытым. Далырга муспут матырыйаалларбын ыыппытым, онон «Саллаат Маша» диэн пьесаны туруорбуттар этэ.

Маша Потапова 1900 с. Табалаах сиригэр Барыллыа күөл арҕаа өттүгэр турар кыра балаҕаңңа төрөөбүт. 1921с. партияҕа киирбит. Саха сирин хоту өттүгэр Сэбиэскэй былаас олохтонуутун кэмигэр, 1922 с .олунньу 20 күнүгэр Верхоянскай куораты үрүңнэр ылбыттар. Түүңңү хараңаларга сорох коммунистар, комсололецтар Бүлүү диэки күрэммиттэр. Кинилэр ортолоругар комсомолка Маша баара.

САССР правительствотын дьаһалынан 1922 с. балаҕан ыйын 16 күнүгэр А.В. Панкратов кыһыл аармыйатын этэрээтэ Верхоянскай куораты босхолообута. И.Афонскай 1958 сыл балаҕан ыйын 24 күнүгэр «Полярная звезда» сурунаалга «Увековечить память Маши-партизанки» диэн суруйуута тахсыбыта. «Биһиги Машабыт » диэн киэн туттан туран, Маша Потапова бүүһүн аттыгар кини олоҕун туһунан кэпсиир суруктаах таас плитаны оңорторуохтарын баҕаралларын туһунан тыыл бэтэрээннэрэ этэллэр.

Светлана Христофоровна сынньалаңңа тахсыаҕыттан төрөөбүт дойдутугар үйэлээҕи суруйан хаалларарга үлэлэһэн, хас да кинигэ тахсыытыгар кылаатын киллэрдэ.

Табалаах улуус улахан нэһилиэгиттэн биирдэстэрэ. Көхтөөх ыччат, аҕам саастаахтар, ытык кырдьаҕастар күөстүү оргуйар бастың үлэлээх, өссө 50-нус сылларга тутуллубут кырдьаҕас кулууптарыгар мусталлар.

Кыайыы сылын көрсө биир ураты тэрээһининэн Табалаахха олорон ааспыт
Аҕа дойду уоттаах сэриитин кыттыылааҕа , уон оҕо аҕата Г.И. Семенов төрөөбүтэ 100 сылыгар аналлаах тэрээһини ыытарга бэлэмнэнэллэр.

Ааптар: Раиса ЧИРИКОВА, Дьааҥы улууһа

2
0
comments powered by HyperComments