Таатта улууһугар ойуур баһаардарын умулуннарыыга олохтоохтор сылдьаллар. Балаҕан ыйын 28 күнүгэр манна үс уот баарын туһунан СИАҕа улуус баһылыга Михаил Соров иһитиннэрдэ.


«Билиҥҥитэ улууска үс баһаар баар. Кыйыга 40 киһи уокка сылдьар. Тыраахтырынан сири хаһан, утары уот ыыттылар. Биһиги оттугунан, аһынан көмөлөһөбүт. Өрөспүүбүлүкэ көрүүчэйинэн итиэннэ көһө сылдьар уоту умулуннарааччынан көмөлөстө. Игидэй баһаарыгар 50 киһи үлэлиир», — диэтэ Михаил Соров.

Улуус баһылыга иһитиннэрбитинэн улууска 505 туонна от умайда. Тыһыынчаттан тахса туонна оту өрүһүйдүлэр.

«Тыал күүһэ бэрт буолан, дьон отун кыайан быыһаабата. Улуус бүддьүөтүттэн үп көрөн дьоммутугар көмөлөһүөхпүт. Маны таһынан Ил Дархантан көмө көрдөстүбүт. Кини бырабыыталыстыбаҕа үбү булары сорудахтаабыт», — диэтэ баһылык.

Тыа хаһаайыстыбатын министиэристибэтэ иһитиннэрбитинэн өрөспүүбүлүкэ үрдүнэн 1900 туонна от уокка былдьаммыт. Министиэристибэ хоромньуну толуйууга үп көрдүүр. Миниистир э.т. Татьяна Осипова 7,6 мөл солкуобайы бүддьүөккэ көрүүгэ сайаапка биэрбит. Бу харчы хоромньу кээмэйиттэн көрөн улаатыан сөп диэн, тыа хаһаайыстыбатын министиэристибэтэ иһитиннэрэр.

Сигэн:

0
0

Хоруй суох

Хоруйдаа

Лимит времени истёк. Пожалуйста, перезагрузите CAPTCHA.