29 Кулун тутар 29.03
  • -15°
  • $ 92,26
  • 99,71

“Таатта” түмсүү сыл бастыҥнарын уруйдаата

14:47, 02 февраля 2016
Текст:
Читайте нас на
Яндекс Новости
ЯДВ

Дьокуускай куораттааҕы “Таатта түмсүү” бэрэссэдээтэлэ, РФ Айылҕа харыстабылын министерствотын Өлүөнэ өрүс тардыытынааҕы уу сулууспатын салайааччыта Иннокентий Андросов өрөспүүбүлүкэ киин куоратыгар олорор биир дойдулаахтарын үүммүт сылынан эҕэрдэлээн туран, ааспыт сыл бастыҥнарыгар анал бэлиэ суруктаах чорооннору туттартаата.

Оттон компакт-спортиҥҥа былырыын Россия чемпиона үрдүк аатын ылбыт Айаал Макаровка “Таатта түмсүү” үрүҥ көмүс анал бэлиэтин туттарда. Литература, культура, спорт, үөрэх, доруобуйа харыстабылын, предпринимательство эйгэлэригэр ситиһиилэрин иһин сыл бастыҥнарынан Саха Өрөспүүбүлүкэтин бочуоттаах олохтооҕо, СӨ үтүөлээх бырааһа Земфира Кузьмина, доруобуйалара хааччахтаах дьон ортолоругар паурлифтиҥҥа Россияҕа миэстэлэспит Иван Баланов, СӨ Ыччат дьыалатыгар уонна дьиэ кэргэн политикатыгар министерствотын “Сыл бастыҥ эдэр суруйааччыта” аатын ылбыт Гаврил Андросов, СӨ Ыччат дьыалатыгар уонна дьиэ кэргэн политикатыгар министерствотын “Сыл бастыҥ эдэр предприниматела” аатын ылбыт Николай Акимов, “Саха сирин бэчээтин тиэргэнэ” регионнар икки ардыларынааҕы кинигэ быыстапкатыгар кыһыл көмүс мэтээли ылбыт Екатерина Винокурова, РФ уонна СӨ үтүөлээх артыыһа Афанасий Афанасьев, доруобуйаларынан хаарчахтаах оҕолорго нуучча дуобатыгар Россияҕа бастаабыт Сайыына Юнчанова, 100 харахтаах дуобакка аан дойду уонна Россия призердара Николай Гуляев, Таатта олоҥхотугар кандидатскай диссертацияны көмүскээбит Надежда Оросина, үс үөрэнээччитэ нуучча тылын БКЭ 100 балы ылары ситиспит өрөспүүбүлүкэтээҕи лицей учуутала Марта Власова, волейболга Россия чемпионатыгар судьуйалаабыт Аркадий Ефремов, көҥүл тустуута эдэрдэргэ Россияҕа бастыыр иһин күрэхтэһиигэ 3-с миэстэлээх Семен Владимиров, Аҕа дойду Улуу сэриитин кыттыылааҕа Иван Саввин, хапсаҕайга, самбоҕа уонна көҥүл тустууга Саха сирин чемпиона, призера Игнат Андросов, өрөспүүбүлүкэ быраастарын ортотугар ыытыллыбыт “Народный доктор” куоталаһыы кыайыылааҕа Гаврил Неустроев, волейболга Саха сирин сүүмэрдэммит хамаандатын чилиэнэ Семен Сабарайкин, этнопедагог Екатерина Чехордуна, предприниматель Николай Мочкин ааттаннылар.

Туймаада туонатыгар олорор биир дойдулаахтарын улуус аҕа баһылыга Михаил Соров эҕэрдэлээтэ, анал наҕараадалары туттартаата уонна ситим быстыбатыгар баҕатын биллэрдэ. Нэһилиэктэр баһылыктара эмиэ биир дойдулаахтарыгар тус эҕэрдэлэрин туттартаатылар.

Ол курдук, Уолба нэһилиэгин баһылыга Василий Рахлеев ааспыт сылга өрөспүүбүлүкэ бочуоттаах олохтооҕо буолбут киэн туттар биир дойдулааҕар Земфира Кузьминаҕа “Уолба нэһилиэгин бочуоттаах олохтооҕо” аатын туттарда. Онон эрдэ Таатта улууһун бочуоттаах олохтооҕун сүкпүт үтүөлээх быраас Земфира Макаровна үс таһымнаах – нэһилиэк, улуус уонна өрөспүүбүлүкэ ытык киһитэ буолбута кэрэхсэбиллээх.

Эҕэрдэ кэнсиэри СӨ үтүөлээх артыыската Анна Максимова, эстрада сулустара Виталий Очиров, Дарья Лаврова, о.д.а. киэргэттилэр. Тэрээһини СӨ үтүөлээх артыыһа, “Баайаҕа түмсүү” салайааччыта Иннокентий Луковцев уонна “Кэскил” оҕо хаһыатын сүрүн редакторын солбуйааччы, “Таатта” түмсүү пресс-сэкирэтээрэ Анисия Иевлева ыыттылар. Таатта улууһун нэһилиэктэрин түмсүүлэрэ туруорбут бириистэринэн лотерея оонньонно. Онон Дьокуускай таатталара бэркэ сэргэхсийэн, үөрэн-көтөн тарҕастылар. Дьон-сэргэ тэрийээччилэргэ махтала улахан.

Санатар буоллахха, Дьокуускай куораттааҕы “Таатта” түмсүү бэрэссэдээтэлинэн иккис төгүлүн талыллан үлэлии сылдьар Иннокентий Андросов уопсастыбаннай тэрилтэ үлэтин тэтимирдээри нэһилиэктэр түмсүүлэрин сөргүппүтэ, түмпүтэ саҥа тыыны киллэрэн эрэрэ көстөр. Ол курдук, улуус 14 нэһилиэгиттэн 11-рин түмсүүтэ көхтөөхтүк үлэлиир. Оттон үс нэһилиэк түмсүүтэ бу сылга тэриллиэхтээҕин Иннокентий Андросов эҕэрдэ тылыгар санаппыта.

Следите за самым важным и интересным в Telegram-канале и WhatsApp-группе ЯСИА