Арассыыйа Киин баана туруорсуутунан, Дьокуускай куорат борокуратуурата «Таатта» бааны бэрэбиэркэлээбитин түмүгэр, хапытаал кээмэйин сымыйанан чөлүгэр баарын курдук оҥорбуттарын кэнниттэн, баан килийиэннэригэр харчы биэриитэ тохтообута биллибит. Маннык быһыы-майгы тахсыбытыгар уонна Москватааҕы филиал каассатыттан улахан суумалаах харчы уһуллубутугар олоҕуран, матырыйаал силиэстийэ уорганнарыгар бэрилиннэ. РФ Холуобунай кодексатын 160 ыстатыйатын 4 чааһыгар (эрэнэн туттарыллыбыт улахан кээмэйдээх баайы-дуолу апчарыйыы, уоруу, ыскайдааһын) буруйу оҥоруутугар тирэҕирэн, «Таатта» бааҥҥа холуобунай дьыала тэрилиннэ.
Билиҥҥи туругунан, сэлиэстийэ бара турар. Санатан эттэххэ, от ыйын 5 күнүгэр Арассыыйа Киин баана үп-харчы эйгэтигэр үлэлиир «Таатта» баан лицензиятын тохтоппута.
Ил Дархан э.т. Айсен Николаев «Таатта» баан килийиэннэрин интэриэстэрин сокуон хараҕынан көмүскүүргэ СӨ бырабыыталыстыбатыгар сорудах биэрдэ. Бу туһунан кини Дьокуускай урбаанньыттарын кытта көрсүһүүгэ эттэ. Табаары оҥорон таһаарааччылар, урбаанньыттар уонна потребительскай ырыынак сойууһун бэрэссэдээтэлэ Ирина Котенко иһитиннэрбитинэн, кинилэр түмсүүлэригэр 88 эмсэҕэлээбит урбаанньыт кэлэн, бары түмсэн, уопсай сүбэнэн дойду Киин бааныгар тустаах сурук ыыппыттар.
Көрсүһүү кыттыылаахтара федеральнай сокуоҥҥа уларытыы киллэрэр наадалааҕын ыйдылар, уурдарыыны страховкалыыр Ааҕыныстыба чааһынай дьоҥҥо уонна урбаанньыттарга эрэ буолбакка, улахан биисинэс бэрэстэбиитэллэригэр, ХЭТ эмиэ страховой төлөбүр оҥоруохтаах диэн баҕа санааларын эттилэр.
Айсен Николаев тахсыбыт быһыыны-майгыны бырабыыталыстыба хонтуруолугар ылбытын бэлиэтээн эттэ.
Марианна ТЫРТЫКОВА, «Саха сирэ» хаһыат, edersaas.ru
