29 Кулун тутар 29.03
  • -13°
  • $ 92,26
  • 99,71

Таатта Амматын үс нэһилиэктэрин II-с спартакиадата үрдүк таһымнаах ааста

12:18, 15 апреля 2016
Текст:
Читайте нас на
Яндекс Новости
ЯДВ

Чымынаайыга дьиҥнээх норуот бырааһынньыга, үөрүүтэ-көтүүтэ буолла.


Чымынаайы 1963 сылга диэри начальнай оскуоланан олорбут буолан, оччотооҕу оҕолор эбэни иккитэ туораан икки аҥар көстөөх сиргэ Чычымах сэттэ кылаастаах оскуолатыгар баран үөрэнэрбит. Атын оскуолаҕа салгыы үөрэнэрбитигэр «Чычымах оҕолоро» аатырарбыт. Чычымахтары кытта олус доҕордуу, сылаас сыһыаннаах буоларбыт. Онтон саҥа тэриллибит Орто Амма нэһилиэгэр үгүс ыал биһиги нэһилиэктэн көспүтэ. Онно хаан-уруу аймахтарбыт үгүстэр.

Бүгүҥҥү прогрессивнай өйдөөх-санаалаах ыччаттарбыт нэһилиэктэр бэйэ бэйэлэригэр сылаас, доҕордуу сыһыаннарын олохтуур сыаллаах тэрийэллэрэ махталлаах суол. Үтүө санааны күннээҕи олохторугар өрө туппут, бу тэрээһин кэскилин, туһалааҕын өйдөөбүт, төрөөбүт нэһилиэктэрин туһугар сүүрбүт-көппүт, бар дьоннорун үөрдээри түбүгүрбүт кимнээхтэрий?

ДНС цифровой маҕаһыыннар Саха сиригэр директордара Семен Морович Оготоев, «Мясной двор» хаһаайыннара Спартак Петров, Айаал Макаров, «Ректайм» фирма сүрүннүүр отделын начальнига Юрий Дарбасов, «Сахатурник» генеральнай директора Иван Попов, Саха наукатын академиятын юридическай салаатын начальнига Максим Мординов, ИП – Никита Протодьяконов, студеннар тутар этэрээттэрин салайааччы Василий Данилов, МЧС үлэһитэ Светлан Федоров о.д.а. Бары кыттыһан 150 тыһыынчалаах бириис туруораллар, мэтээл, диплом, халандаар оҥортороллор, тэрээһинигэр кытталлар. Балаһыанньа быһыытынан 8 спортивнай көрүҥү киллэрбиттэр. Ол иһиттэн 2 көрүҥү ыытар нэһилиэк бэйэтэ талар. Баһылыктарга аналлаах туспа күрэхтэһии киирэр. Онон баһылыктар тэҥҥэ күрэхтэһэллэр. Оскуола үөрэнээччилэриттэн аҕа саастаахтарга тиийэ киэҥ араҥа хабыллар. Холобур, Чычымахтан 70 кыттааччы кэлбит (баһылык С.С.Соров). Спортивнай көрүҥнэри сэргэ культурнай–маассабай үлэ эмиэ киирэр ырыаҕа, үҥкүүгэ, сценкаҕа күрэхтэстилэр.

Бастаабыт нэһилиэктэргэ спорт саалаларыгар аналлаах спортивнай тренажердары биэрэллэр эбит. Ол бирииһи «Сахатурник» тэрилтэ туруорар (ген. директора И.П.Попов).

Дьэ, онон уопсай түмүк хайдах буолла?

8 спортивнай көрүҥҥэ, культурнай-маассабай үлэ түмүгүнэн ситиһиилээхтик кыттан, Уус Амма (баһылык Е.В.Васильев) – бастакы – көрүҥтэн сэттэтигэр маҥнайгы миэстэлээх. Бирииһэ – Блок тяга, 2 устуука турник, Орто Амма (А.У.Кулачиков) – иккис. Бирииһэ – Блок тяга, Амма (С.С.Соров) — үһүс. Бирииһэ – «Коркин истиэҥкэтэ» (тупсарыллыбыт).

Бастаабыт нэһилиэк баһылыгар Е.В.Васильевка көһө сылдьар кубок туттардылар. Спартакиада былааҕын Егор Владимирович эһиил ыытыллыахтаах сиригэр, Амма нэһилиэгин баһылыгар С.С.Соровка туттарда.

Бу маннык киэҥ кэскиллээх, кэрэхсэбиллээх бачыымы Таатта улууһун атын да нэһилиэктэрин Дьокуускайга олорор кыахтаах ыччаттара иилэ хабан ылан тэрийиэхтэрин сөп эбит. Бүгүҥҥү дьалхааннаах олохпутугар саха норуота бииргэ сомоҕолоһон, эйэлээхтик, өйдөһөн-өйөһөн, чөл куттаах чэгиэн-чэбдик олордоҕуна эрэ туруулаһыан сөп.

Түмүккэ, Семен Морович нэһилиэк баһылыгар Егор Владимировичка махтанна: «Аһары үчүгэйдик тэрийдигит. Эһиги истиҥ сыһыаҥҥытыттан бэйэбит даҕаны сүргэбит көтөҕүллэн, астынан, күүс ылан, өссө даҕаны дойдубут туһугар туох эрэ үчүгэйи өссө оҥорбут киһи диэн санаалаах үөрэ-көтө бардыбыт. Аны күһүн Харбалааҕы төрүттээбит, «Коммунизм» совхоһу тэрийбит талааннаах салайааччы И.В.Николаев төрөөбүтэ 80 сылын куоракка бэлиэтиэхпит. Амма үс нэһилиэктэриттэн бэрэстэбиитэллэри ыҥырыахпыт».

Онтон биһиги, Аммалар, маннык үтүөкэн ыччаттардаахпытыттан үөрэ, киэн тутта, махтана хаалабыт. Санаабыккыт сатаннын, ылсыбыккыт ыпсан истин, толкуйдаабыккыт туолан истин.

Следите за самым важным и интересным в Telegram-канале и WhatsApp-группе ЯСИА
Тутаах тыллар