Кыайыы күнүн бүгүҥҥү дьоруойунан Таатта улууһун Ытык Күөлүн олохтооҕо кырачаан Артур буолла.
Мин уолчаан ийэтин төлөпүөнүн булан анаан кэпсэттим.
— Аныгы үйэ сиэринэн социальнай ситим дьоруойунан буолбут киһи хас саастааҕый? – диэн кэпсэтиибин саҕалаатым.
— Бэс ыйыгар икки аҥар сааһын туолуохтаах.
— Ити Кыайыы күнүнэн көстүүм тикпиккит дуо?
— Биһиги дьиэ кэргэн Чурапчыга олоробут. Аҕабыт баһаарынай депоҕа үлэлиир. Мин кэтэхтэн үөрэнэ сылдьабын. Манна куоракка ыам ыйын саҥатыгар кэлбитим. Оҕобун муус устар бүтүүтэ Ытык Күөлгэ ийэбэр илдьэн туттарбытым. Дьонум бүгүн параакка кыттаары бэлэм бөҕө этилэр. Ийэм: “Сиэммэр саллаат таҥаһым тигиэм”, — диэн эрдэттэн былааннааҕа. Мин ас астыы сылдьан, сотору-сотору дьоммор эрийэбин. Ийэм: “Ардах түһүөх курдук. Ньачаас сылдьан баран дьиэлиэхпит. Эбэҥ сарсыарда тоҕуска бэтэрээннэр мустууларыгар барбыта”, — диэн кэпсээбитэ. Парад ортолоон эрдэҕинэ, мин ийэбэр эрийэн сэрэттим: “Умнума, оҕом наһаа сытыы, биир сиргэ туруо суоҕа. Олох сатаан тутуоҥ суоҕа. Артур элбэх киһиэхэ умуннаран, куотан хаалыаҕа, үчүгэйдик көрө сырыт”. Арай сотору буолан баран, ийэм: “Туйаара, оҕоҥ наһаа ынырык дии!” – диэн төлөпүөҥҥэ хаһытыыр. Мин наһаа соһуйдум уонна куттанным: ”Туох буолла?” – диэн ыйыттым.
— Артур параадка кытта сылдьар. Чиэс биэрии бөҕө. Олох туттарбат! Киһи тылын истибэт. Ити баар дии:”Артур, тохтоо эрэ-ээ…”, — диэн ийэм ыксаабыт саҥатын истэн, дьэ уоскуйдум. Мин туох эрэ буоллаҕа диэн куттаммытым ааһан: “Ийээ, уоскуй. Сиэҥҥин ситэн ыл уонна параадтаан баран, дьиэлээҥ”, — диэн кэпсэтиибитин түмүктээтим. Арай сотору буолаат батсаабынан, инстаграмынан оҕом хаартыската, түспүт видеота тигинээн кэлбэт дуо? “Красота Якутии” диэн инстаграм сирэйигэр 28 500 тыһ. киһи киирэн көрбүт. Билигин өссө элбээбитэ буолуо. Интернет таһаарыылартан төлөпүөн бөҕө: “Оҕоҕун бэчээттииргэ сөбүлэһэҕин дуо?” – диэн. Таатта уонна Чурапчы улуустарын батсаап бөлөхтөрүн аҕыйах мүнүүтэ иһигэр Артур хаартыскалара толорон кэбистилэр, — диэн кэпсиир эдэр ийэ.
— Аҕыйах чаас иһигэр Саха сирин бары улуустарыгар биллэ охсубут батсаап уонна инстаграм дьоруойа дьиэтигэр тиийэн, тута утуйда ини? – диэн ыйыппыппар, уол ийэтэ күлэ түһэр:
— Хантан?! Оһох аттыгар муостаҕа сыттыгын ууран баран, сытынан кэбиһээт, “инста сулуһа” күннээҕи дьыалабын толордум диэбиттии, дьэ холкутугар түспүт уонна төлөпүөнүн ылан, ютубу хасыһан барбыт. Онно бэйэтэ “Тыраахтар” туһунан анал сирэйдээх. Эбэтэ булан биэрбит. Онно киирэн хаһыспытынан барар. Кини бүгүҥҥү интэриэһэ – тыраахтар, — диэн Туйаара уолчаанын туһунан ирэ-хоро кэпсиир.
… Ити курдук икки саастаах уол оҕо бүгүҥҥү параакка сылдьан, чиэс биэрэн, аны дьиэтигэр тиийэн “ютубтаан”, бүгүҥҥү олох сайдыытын туоһутунан буолла. Сэрии толоонугар олохторун толук биэрэн, сэрииттэн эргиллибэтэх дьоммут барахсаттар бу бүгүҥҥү күн дьоруойун көлүөнэтин кэскилин туһугар фашизмы төрдүттэн суох гыннахтара. Оттон Уус-Алдантан уонна Тааттаттан тардыылаах Чурапчы улууһун олохтооҕо, Чурапчатааҕы «Чуораанчык» оҕо саадын иитиллээччитэ Артур билигин дьиэтигэр дьоллоох баҕайытык эбэтин кытта куустуһан баран утуйа сыттаҕа.
