29 Кулун тутар 29.03
  • -14°
  • $ 92,26
  • 99,71

“Төрүт дойдубут Өргүөт” кинигэ Дьокуускайга сүрэхтэннэ

12:29, 04 апреля 2021
Текст:
Читайте нас на
Яндекс Новости
ЯДВ

А.Е.Кулаковскай аатынан норуоттар доҕордоһууларын дьиэтигэр муус устар 3 күнүгэр “Төрүт дойдубут Өргүөт» кинигэ сүрэхтэннэ. Ааптар Вера Спиридоновна Нанова-Солдатова дьонун-сэргэтин мунньан, истиҥник-иһэрэхтик кэпсэттилэр.


Бу күннэргэ Үөһээ Бүлүү улууһун, Өргүөт нэһилиэгин олохтоохторугар дьоһуннаах бэлэҕи Арассыыйа суруналыыстарын сойууһун, СӨ суруйааччылар сойууһун чилиэнэ, СӨ норуот хаһаайыстыбатын үтүөлээх үлэһитэ, СӨ култууратын туйгуна, Арассыыйа кырдьаҕас историческай куораттарын ассоциациятын бочуоттаах чилиэнэ, Орто Халыма, Үөһээ Бүлүү улуустарын, Өргүөт нэһилиэгин бочуоттаах олохтооҕо, суруйааччы, суруналыыс Вера Спиридоновна Нанова-Солдатова оҥордо. Кини “Төрүт дойдубут Өргүөт» саҥа кинигэтэ күн сирин көрдө.

Вера Спиридоновна “Дойдум тыына”, “Тойокубар – дойдубар”, “Бүгэн сыппат Бүлүү эбэм”, “Кынаттаабыт кыһабыт”, “Санаа ардаҕа”, “Саргы санаа” хоһоон хомуурунньуктарын ааптара. Кини икки ахтыы кинигэлээх, ыччат уоһуттан түһэрбэт ырыалардаах, тапталлаах кэргэн, күндү ийэ, эйэҕэс эбэ уонна хос эбэ буолар.

«Бары таптыыр күндү киһибит, талааннаах салайааччыбыт Вера Спиридоновна Нанова-Солдатова өр кэмҥэ санаа ырата оҥостубут төрүт дьонун, хаан-уруу аймахтарын төрдүлэриттэн токкоолоһон, аймахтарын түмэн, көмөлөһүннэрэн ахтыы кинигэни суруйан бар дьонугар, норуотугар утары уунна. “Төрүт дойдубут Өргүөт” диэн кинигэҕэ ХVII үйэҕэ олорон ааспыт биир дойдулаахпыт Аҥкый диэн киһиттэн силис тардан сириэдийбит аҕа ууһа, кини үс уола Тиэрэхэп, Тиэрэхэп улахан уола Болоһуок Тэрэппиин, Болоһуок Тэрэппиин бастакы уола Малыс Сэмэн, итиэннэ Малыс Сэмэн сыдьааннара муһуннулар. XVII үйэттэн төрүттээх Өргүөт дьонун, Аҥкый аҕа ууһуттан сыдьааннаах Малыс Сэмэн, Боттуомай Борокуоппай төрөппүт, ииппит 9 уола ыччат тэниппит, олох олорбут 6 уолун ыччаттарын, кинилэр үлэлэрин, олохторун туһунан төрүт-уус дьоммут, хантан хааннаахтарын, кимтэн кииннээхтэрин билэн-көрөн сүргэбит көтөҕүлүннэ«, — диэн СИА-ҕа Марина Винокурова кэпсээтэ.

Өргүөт – Бүлүү эбэ хотун сүнньүгэр киэҥник биллибит, номоххо, сурукка киирбит нэһилиэктэртэн биирдэстэрэ. Төрүт дьон төрүччүтүн түмэн олоххо киллэрбит Вера Спиридоновна Малыс Сэмэн сыдьаана.

Кинигэ сүрэхтэниитигэр Вера Спиридоновна «Дойду ахтылҕана» диэн ис сүрэхтэн тахсыбыт дууһаны долгутар хоһооно мустубут дьону үөртэ.

Следите за самым важным и интересным в Telegram-канале и WhatsApp-группе ЯСИА