Мэҥэ Хаҥалас оройуоннааҕы тус сыаллаах бырагырааматын чэрчитинэн сыл аайы кыаммат араҥа дьиэ кэргэҥҥэ оҕону оскуолаҕа тэрийэн ыытыыга көмө оҥоһуллар. Быйыл 40 тыһыынча солкуобай суумалаах үп көрүлүннэ.
Атырдьах ыйын 12 күнүгэр сокуоннай саастарын ситэ илик оҕолор дьыалаларыгар улуустааҕы хамыыһыйа сэкирэтээрэ Анастасия Федорова уонна Ис дьыала отделын иһинэн оҕолору кытта үлэлиир салаа иниспиэктэрэ, старшай лейтенант Наталья Трифонова улууска биир саамай элбэх ахсааннаах социальнай көмөҕө наадыйар Төҥүлү нэһилиэгин сэттэ ыалыгар сылдьаннар үөрэххэ туттуллар тээбириннэри бэлэхтээтилэр. Кинилэр истэригэр бастайааннай үлэтэ суох, сорохторо иһэр-аһыыр, оҕолорун соҕотохтуу улаатыннарар ийэлэр, аҕалар, үстүү, биэстии оҕолоох ыаллар бааллар. Исписэлиистэри Төҥүлү нэһилиэгин ыччатын лиидэрэ Алиса Куприянова арыаллаата.
Төҥүлүнү таһынан Тумулга биир, Аллараа Бэстээххэ икки дьиэ кэргэҥҥэ сырыттылар. Оҕолор күүтүллүбэтэх бэлэҕи тутаннар үөрэн мичилистилэр, үөрэх дьылын этэҥҥэ саҕалыылларыгар туһанар маллара баар буолбутуттан санаалара көтөҕүлүннэ.
Саастарын ситэ илик оҕолор дьыалаларыгар хамыыһыйа уонна ИДьО оҕолору кытта үлэлиир салаа бастакы уон ыалга сырыытын таһынан бу күннэргэ учуокка турар социальнай өртүнэн көмөҕө наадыйар, үлэлээбэт төрөппүттэрдээх оҕолорго барыларыгар сылдьыахтара. Оттон үбэ-харчыта тиийбэт ыалларга көмөлөһүөн баҕалаахтар баар буоллахтарына, хаһан баҕарар сокуоннай саастарын ситэ илик оҕолору социальнай-реабилитациялыыр кииҥҥэ тугу баҕарар хаалларыахтарын сөп.
