Анатолий Нелунов, гуманитарнай чинчийии институтун үлэһитэ:
— “Саха сирэ” уонна “Якутия” хаһыаттары куруук ааҕабын. Бүтэһик кэмҥэ хаһыаттар ис хоһоонноро биллэ тубуста, интэриэһинэй суруйуута элбээтэ. Урут босхону ылан ааҕар эбит буоллахпытына, билигин харчыга ааҕабыт. Бу уларыйыы, мин саныахпар, сөптөөх быһаарыныы. Хаһыаты босхо тарҕатыы оҥорон таһаарааччылар үлэлэрин сыаналаабат буолууга тэҥ.
Николай Ребров, суруналыыс, СӨ култууратын үтүөлээх үлэһитэ:
— Урут “Саха сирэ” хаһыакка буолбут уларыйыылары тута сөбүлээбэтэҕим, ол туһунан олохтоохтук быһааран хаһыат эрэдээксийэтигэр элбэхтик эппитим, атын хаһыакка даҕаны суруйбутум. Ол эрээри хаһыат үйэлээх үтүө үгэстэригэр төннөрүгэр эрэнэрим. Онтум уһуннук күүттэрбэтэ, хаһыат бу сыл от ыйын 25 күнүгэр 40 балаһанан урукку кыаҕынан, кээмэйинэн төлөбүрдээх сэргэх, сонун нөмүөрэ тахсыбыта ону туоһулуур уонна мэктиэлиир. Сардаана Баснаева “Эмчит, отоһут Мэхээлэ Чааскын” суруйуутун ураты тутан бэлиэтиибин, суруналыыс улахан ситиһиитинэн сыаналыыбын. Сардаана бу сонун тиэмэни хорсуннук ылсан, ис хоһоонун толору арыйан, тылын-өһүн чочуйан, хаартыска сыһыаран, ааҕааччы билиитигэр таһаарбыта хайҕаллаах. Хатылаан этэбин, хаһыат саҥа нүөмэригэр үчүгэй матырыйааллар элбэхтэр, ону ааҕааччылар да сөпкө сыаналыылларыгар эрэнэбин. Саҕалааһын астыннарар, эрэдээксийэ сыалын ситиһэригэр эрэл улахан, ону олоххо киллэрэргэ хаһыат кэлэктиибин уопуттаах уонна эдэр, элбэҕи эрэннэрэр суруналыыстарыгар бары кыахтар бааллар уонна уопсастыбаннай кэрэспэдьиэннэр, ааҕааччылар күүс-көмө буолуохтара турдаҕа.
edersaas.ru
