Киин куорат түүҥҥү аралдьытар-саататар кулууптарыгар боруогуруута, уҥа-хаҥас дайбаһыыта, охсуһуута суох биир эмит күн ааһара дуу? Ааспыт түүн охсуспуттар эрэ буолбакка, өссө киһини быһахтаабыттар.
РФ Росгвардиятын федеральнай сулууспатын Саха сиринээҕи управлениетын пресс-сулууспата иһиттиннэрбитинэн, бу сарсыарда 05.00 чаас саҕана Дьокуускай куорат биир түүҥҥү кулуубуттан «суһал кунуопкаттан» сигнал киирбит.
Ыйыллыбыт сиргэ Росгвардия управлениетын харабыллааһыҥҥа салаатын (ОВО) полицейскайдара тиийбиттэрэ — кулууп аттыгар охсуһуу буолбут, онно Тааттаттан төрүттээх 35 саастаах киһини искэ быһаҕынан анньыбыттар. Эмсэҕэлээбит киһини балыыһаҕа киллэрбиттэр.
Оттон бу ыар буруйу оҥорууга уорбаланааччыны — Дьокуускай куораттан төрүттээх, урут сууттана сылдьыбатах 18 саастаах уолу — полицейскайдар тоҥ суолун тордоон тутан, полиция дьуһуурунай чааһыгар илдьибиттэр.
Бука, холуобунай дьыала тэриллэрэ буолуо. Ол туһунан иһитиннэрии суох.
