Атырдьах ыйын 30 күнүгэр Ньурба улууһун баһылыга Алексей Иннокентьев Түүкээн үрэҕин туоруур муостаҕа Ил Дархан Айсен Николаевы кытары көрүстэ. Бу туһунан улуус дьаһалтатын пресс-сулууспата суруйар.
Көрсүһүүгэ «Бүлүү» федеральнай суол управлениетын салайааччытын солбуйааччы Игорь Толстых, генеральнай бэдээрээтчит «Хотьковский автомост» ХЭТ, «Сибмост» үлэһиттэрэ кыттыыны ыллылар.
Игорь Толстых иһитиннэрбитинэн, үлэ кыраапык быһыытынан бара турар. Кыратык урутааһын баар. Балаҕан ыйын 27 күнүгэр муостаны үөрүүлээх быһыыга-майгыга аһаллара былааннанар.
Муоста Үөһээ Бүлүү-Ньурба икки ардыгар, Бүлүү А-331 айан суолун 702 килэмиэтиригэр тутулла турар. Кини 267 миэтэрэ уһуннаах, киириигэ-тахсыыга 4-түү км уһуннаах аспаал суоллаах буолуо. Күргэ тутуутугар 2,5 млрд солкуобай көрүллүбүт.
Муоста аһыллыытын Ньурба, Сунтаар эрэ улуустарын олохтоохторо буолбакка, федеральнай трассанан айаннааччылар бары күүтэллэр.
This post was published on 31.08.2020 12:02 12:02