Саха сиригэр 1985 сыллаахха оскуоланы бүтэрбиттэр түмсүүлэрин көҕүлээһининэн өрөспүүбүлүкэ үрдүнэн, «Үтүө дьыала» Кубога айаҥҥа туруммута. Горнайдарга эстафетаны бүлүүлэр туттардылар.
Бу күннэргэ Горнай улууһун үгүс нэһилиэктэригэр 1985 с. оскуоланы бүтэрбиттэр үтүө дьыала аахсыйаларын ыыталлар:
– Инбэлииттэр уонна кырдьаҕастар дьиэлэригэр 30 кууб кумаҕы куттулар;
– тыыл, үлэ бэтэрээнигэр Мария Михайловна уонна Егор Егорович Петровтарга көмөнү оҥордулар;
– аҕыс оҕолоох ийэҕэ Акулина Федотовна Иннокентьеваҕа көмө оҥоһулунна;
– Солоҕон выпускниктара ытык мааны хатыҥнарын саҥа күрүөлээтилэр, биир прицеп бөх тиэйтэрдилэр. Нэһилиэк Бочуоттаах олохтооҕо Матрена Андреевнаҕа, сэрии огдообото Варвара Матвеевнаҕа, сэрии тулаайахтарыгар Вера Игнатьевнаҕа, Елизавета Егоровнаҕа, Иван Ильичкэ сэмэй бэлэҕи оҥордулар;
– Агафья Павлова бэйэтэ тикпит сахалыы ырбаахыны Васильевтар оҕолоругар бэлэхтээтэ;
– Орто Суртар инбэлиит Ульяна Алексеевна Максимоваҕа биир куул хортуоппуй уонна ас наборунан көмө оҥордулар;
— Маалтааны выпускниктара “Үйэ саас” бэлиэлээх, бу күһүн 101 сааһын туолбут ытык киһилэригэр Власий Васильевич Кубаровка сэмэй бэлэхтэрин биэрдилэр;
— Күөрэлээх выпускниктара оҕо уһуйааныгар көмөлөстүлэр;
— Атамайдар элбэх оҕолоох ыалга анаан аахсыйа ыыттылар;
– Одуну оскуолатын бүтэрбиттэр учууталларыгар тэлгэһэтин күрүөтүн туттулар; нэһилиэк дьаһалтатын тула мас олортулар.
Нэһилиэнньэ бэйэтэ ис санаатыттан, үтүө дьыаланы оҥороро олус хайҕаллаах. Бэйэбит тула сырдыгы эрэ көрдөхпүтүнэ, тулабыт ыраас, кэрэ буолуоҕа. Маннык үтүө хамсааһыннар элбии турдуннар.
Бэйэбит корр. http://ulus.media
