Күн бүгүн 1215 элбэх кыбартыыралаах дьиэлэр ититэр ситимнэрэ ыраастанан сууйуллубут, ол аата «Якутскэнерго» ситимиттэн ититиллэр куорат дьиэлэриттэн 93 бырыһыана. Куорат балыыһаларын, поликлиникаларын 80%, оскуолалар 95%, оҕо саадтара 92% ититэр ситимнэрэ ырааһырбыт.
Сыл ахсын ититэр ситими сууйалларын, ыраастыылларын таһынан, итии уу турбатын опрессовкалыыллар, запорнай арматураны чинчийэн көрөллөр, ититэр ситим саахалланар туруктаах учаастактарын саҥардаллар о.д.а. үлэни ыыталлар.
Бу үлэ кэмигэр оҥоһуллуон, туһанааччылар харчыларын кэмигэр төлөөбөттөрө атахтыыр. Билиҥҥи туругунан, 790 мөл. солк. суумалаах иэс мунньуллубут.
«Өскөтүн дьон дьиэлэрин сылытыытын төлөөбөт, кэпсэтиигэ утары барбат түгэннэригэр, кыһын ортото итиини букатын арааран кэбиспэппит эрээри, сөрүүн буоларын курдук кыччатан биэриэхпитин сөп. Дьиэлээхтэр мунньубут иэстэрин биирдэ сатаан ууран биэрбэт түгэннэригэр, кыра-кыралаан төлүүллэрин курдук уһатан биэрэбит. Билиҥҥитэ «Портовской», «Университетскай» ТСЖ, Киин, Строительнай ОДьКХ улахан иэстээхтэр. Сылааһы туһанааччылар иэстэрэ 1 млрд солк. тиийэрэ чугаһаата. Ол иһин инникитин салайар хампаанньалар өҥөлөрүттэн аккаастанан, нэһилиэнньэ биһиэхэ быһа төлүүрүн курдук оҥоруохпутун баҕарабыт», — диэн «Якутскэнерго» Дьокуускайдааҕы салаатын начаалынньыга Валентина Ильинова этэр.
Онон, тымныы дьиэҕэ кыстыаххытын баҕарбат буоллаххытына, хомунаалынай хаһаайыстыба төлөбүрүн ый ахсын хойутаппакка төлөөн иһиэххэ наада.
Марианна Тыртыкова, «Саха сирэ», edersaas.ru
