Суруналыыстарга лауреаттар быһаарылыннылар

0
125

Саха сирин Суруналыыстарын сойууһа сылын аайы ыытыллар долгутуулаах куонкурус түмүгүн таһаарда. Дьүүллүүр сүбэ быйылгы «Кыһыл көмүс бөрүө» үрдүк аатын «Ситим» медиа-бөлөх генеральнай дириэктэрин солбуйааччы Владимир Степановка биэрэргэ быһаарда. Онтон бэчээттээн таһаарар эйгэҕэ бастыҥынан оскуола үөрэнээччилэригэр аналлаах «Кэскил» хаһыаты ааттаата. «Бастыҥ интернет-издание» кыайыылааҕынан Саха информационнай агентство буолла.


«Куонкуруска  киирбит үлэлэри көрүүгэ, урут тутулуга суох экспердэри ыҥырар этибит. Онтон быйыл уларытыы киллэрэммит, Суруналыыстар сойуустарын Бырабылыанньатын чилиэннэрин дьүүллүүр сүбэҕэ кыттыһыннардыбыт. Күрэстэһээччилэр үлэлэрэ, хаһан баҕарар буоларын курдук, кичэллээхтик көрүлүннүлэр», — диир СӨ Суруналыыстар сойуустарын бэрэссэдээтэлэ Галина Бочкарева.

«Кыһыл көмүс бөрүө» иһин быйыл 14 суруналыыс күрэстэстэ. Манна суруйар киһи уһулуччу суолталаах тиэмэни сырдатыыта, кырдьыгы хайдах баарынан тиэрдиитэ, суолтата көрүлүннэ. Айар ньымата, жанр эгэлгэтэ, тыл-өс баайа сыаналанна.  Түмүккэ,  Владимир Степанов матырыйааллара бары ирдэбилгэ толору эппиэттииллэринэн, кини «Кыым» хаһыакка ырытар-ырыҥалыыр, чинчийэр, суруйуулара норуоту чахчы да сэҥээрдэллэринэн, болҕомтону улаханнык тардалларынан үрдүк сыанабылы ыллылар, — диэтэ кини.

«Кыһыл көмүс микрофон» бириэмийэҕэ телесуруналыыстартан «Саха» ГТРК  анал кэрэспэдьиэнэ Дмитрий Макаров тигистэ. Манна атылыы наҕарааданы араадьыйа суруналыыстарыттан «Саха» НКИХ  араадьыйанан биэриигэ Дирекциятын оҕо-ыччат уонна спортивнай бырагыраамаҕа шеф-редактора Надежда Павлова ылара быһаарылынна.

«Сыл дебюта» бириэмийэни дьүүллүүр сүбэ «Саха» НКИХ «Кэл, олор, сэhэргэhиэх»  диэн биллэрэр-көрдөрөр, сынньатар-аралдьытар телебиэриитин айар бөлөҕөр туттарыаҕа.

Бастыҥ интернет-издание аатын Саха информационнай агентство ылар буолла. Улуустарга быйылгы сылга бастыҥынан «Новости Жиганска»-«Эдьигээн сонуннара», өрөспүүбүлүкэ хаһыаттарыгар Н.Е.Мординова-Амма Аччыгыйа аатынан «Кэскил» оҕо хаһыата ааттаннылар. Онтон бу хаһыат фотокэрэспэдьиэнэ Василий Пак “Сыл хаартыската” номинация кыайыылааҕынан таҕыста.

«Манна даҕатан эттэхпинэ, бэчээт уонна көрдөрөр-иһитиннэрэр эйгэлэргэ инникитин жанр эгэлгэтэ элбиирэ буоллар диэн баҕарабыт. Биллэринэн, көстөрүнэн, сүрүн оруолу иһитиннэрэр-биллэрэр матырыйааллар уонна интервьюлар ылаллар. Оттон публицистика уонна уочарка сэдэх. Аны туран, ирдэһэн, сирийэн суруйуу (расследование) матырыйааллара  аҕыйахтар. 2016 сылга бу номинацияҕа баара эрэ түөрт суруналыыс кытынна. «ЯкутияИнфо» суруналыыһа Тимофей Ефремов былаас уонна кэтэх биисинэс хардарыта сибээстээх үлэлэһиилэригэр баар кыһалҕалары хайдах баарынан аһаҕастык, кырдьыктаахтык суруйбута сыаналанна, кыайыылаах аатын ылары ситистэ», — диир Бочкарева.

«Медиа-персона года» талыллыбатаҕын иһитиннэрдэ: «Кыайыылааҕы дьон-сэргэ истэр-билэр итиэннэ суруналыыстыка эйгэтигэр туох эрэ суолталааҕы оҥорбут буолуохтаах. Хомойуох иһин, итиннэ сөптөөх күрэстэһээччи суоҕунан, номинация кимиэхэ да бэриллибэтэ».

Онтон атын бириэмийэлэри дьүүллүүр сүбэ маннык быһаарбыт:

«Сыл дизайна» — Сайаана Саввина («Үөһээ Бүлүү» хаһыат верстальщига, Үөһээ Бүлүү улууһа).

Үлэтигэр бастыҥ түмүктээх Татьяна Романова («Өлүөхүмэ» хаһыат эрэдээктэрин солбуйааччы, Өлүөхүмэ) «За результативность» бириэмийэҕэ тиксибит.

«Сыл общественнай кэрэспэдьиэнэ» быйыл Николай Слепцовка, «Ил Түмэн», «Кэскил» өрөспүүбүлүкэ хаһыаттарын общественнай кэрэспэдьиэнигэр туттарыллар.

«Сыл бастыҥ пресс-сулууспата» — ХИФУ пресс-сулууспата буолбут.

1
0

Хоруй суох

Хоруйдаа