Былырыын күһүн Уус Алдан улууһугар итирик суоппар хас да үөрэнээччини түҥнэри көппүтэ. Бу айдааннаах дьыалаҕа суут бириигэбэрэ тахсыбытын туһунан СӨ Борокуратууратын пресс-сулууспата иһитиннэрдэ.
Санатар буоллахха, 2017 сыл алтынньы 14 күнүгэр, киэһэ 22.15 мүн. саҕана, Уус Алдан улууһун Суотту сэлиэнньэтигэр (Оҕуруоттаахха) Суотту 43 саастаах олохтооҕо «Тойота Гайа» массыынатынан алта оҕону (бастаан «сэттэ оҕо» диэн этэ) түҥнэри көппүтэ. Оҕолор оскуола дискотекатыттан төннөн, суол кытыытынан кэккэлээн хааман испиттэр этэ.
Ити иэдээн түмүгэр, тохсус кылаас 15 саастаах үөрэнээччитэ балыыһаҕа сырдык тыына быстыбыта. Атын оҕолор эт-хаан эчэйиитин ылан, улуус киинин балыыһатыгар киллэриллибиттэрэ. Кинилэри кытта психологтар үлэлээбитттэрэ.
Быһылаан сириттэн куоппут буруйдаах суоппары полицейскайдар туппуттара. Онно алкотестерынан бэрэбиэркэлээбиттэрэ, 0,94 мг/л көрдөрбүт этэ, ол эбэтэр, бу суоппар хааһы курдук итиригэ.
Бу чахчынан РФ Холуобунай кодексатын 264-с ыст. 4-с чааһынан, ол эбэтэр, суол быраабылатын кэһии түмүгэр, итирик туруктаах сылдьан, киһини сэрэҕэ суохтан өлүүгэ тиэрдии бэлиэтэ баарынан, холуобунай дьыала тэриллибитэ.
Дьыала хаамыыта СӨ Борокуратууратын хонтуруолугар сылдьыбыта.
Суут мунньаҕар буруйдаах суоппар буруйун толору билиммит, кэмсиммит.
Суут кинини 3 сыл 6 ыйга көс-холуонньаҕа көҥүлүн быһарга итиэннэ массыына ыытар быраабын 3 сылга быһарга уурбут.
Бириигэбэр сокуоннай күүһүгэр киирэ илик, өрүттэр ааһыныахтарын сөп.
This post was published on 01.03.2018 18:30 18:30