Бэчээт дьиэтигэр өссө биир интэриэһинэй көрсүһүү ыам ыйын 24 күнүгэр буолан ааста. Сахабыт сиригэр аҥардас сылдьар дьон ахсаана элбии турарынан, республика араас улуустарыттан суорумньуһуттар түмсэн, санаа атастастылар.
Суорумньуһуттар бастакы көрсүһүүлэрин түмүгүнэн, бэс ыйын 9 күнүгэр Дьокуускай куоракка, республика таһымыгар семинар ыытыллара былааҥҥа киирдэ. Итиэннэ көрсүһүү кыттыылаахтара, от ыйын 9 күнүгэр Нам улууһун Хамаҕаттатыгар “Кыыс ыһыаҕын” үрдүк таһымҥа ыытарга диэн биир санааҕа кэллилэр.
Төгүрүк остуол кыттыылаахтара кэлиҥҥи сылларга нэһилиэктэргэ ыал буолбакка сылдьар дьон элбээбитин, хас биирдии ыалга ити боппуруос сытыытык турар буолбутун бэлиэтээтилэр. Онон өбүгэлэрбититтэн илдьэ кэлбит, суорумньулааһын, билиҥҥи биһиги олохпутугар олус наадалаах, эппиэтинэстээх буолбутун өйдөөн, Саха Республикатын Дьахталларын Сойууһа, бэрэссэдээтэл Анжелика Андреева бу көрсүһүүнү иилээн-салайан ыытта.
Кэлбит суорумньуһуттар үлэлэрин-хамнастарын билиһиннэрдилэр, көдьүүстээх үлэ түмүгэр, Саха сиригэр хас ыал эбиллибитин, саҥа тэриллибит дьиэ кэргэннэртэн төһө оҕо төрөөн, республика олохтооҕун ахсаанын эппитин эттилэр. 20-тэн тахса сыл суорумньу хайысхатыгар үлэлээбит, Чурапчы Мугудайыттан кэлбит, уопуттаах суорумньуһут Мария Толстоухова бу курдук кэпсээтэ:
— Мин билиҥҥи туругунан, 40-ча ыаллаахпын. Орто дойдуга кэлбит киһи хайаан да, аналын көрсөн, ийэ-аҕа буолуу үөрүүтүн билиэхтээх. Хомойуох иһин, бу бүтүн норуот кыһалҕатыгар кубулуйда. Хайа да нэһилиэккэ, кырдьаҕас төрөппүттэрин, бырааттарын, балыстарын көрөн, кинилэри үөрэхтээн, киэҥ сиргэ таласпакка, дойдуларыгар бүгэн, олорон хаалбыт аҥардас сылдьар дьон ахсаана биллэрдик улаатта. Онон ити боппуруоһу, үрдүкү салалта таһымыгар таһааран, үлэ көдьүүстээхтик барарын ситиһиэххэ наада. Аттынааҕы нэһилиэккэ, улууска дьон тылын ылыннаран илдьэргэ, транспорт көстүүтэ, суол-иис төлөбүрэ уустугуран иһэр. Суорумньуһуттар бары общественнай үлэ быһыытынан сылдьабыт. Улууска биир эр киһини, биир дьахтары суорумньу хайысхатынан үлэлэтэргэ штат быһыытынан көрөллөрө буоллар, үлэбит өссө түмүктээх буолуо этэ дии саныыбын.
Валентина Лукачевская, Тааттаттан төрүттээх, Дьокуускайга олорор суорумньуһут:
— Былырыын бэйэм сүүрэн-көтөн, бириис булан, Тааттаҕа “Кыыс ыһыаҕын” тэрийэн ыыппытым. Тааттаҕа суорумньунан дьарыктанар дьон аҕыйахпыт. Аҥардас дьоммут ахсаана элбэх. Суорумньунан дьарыктанар киһиэхэ ити дьыаланы ылсара, улахан эппиэтинэһи сүктэрэр. Адьас атын көрүүлээх, туспа иитиилээх, сааһырбыт дьону көрүһүннэрэн, салгыы ити билсиһиигин сайыннаран, ыал буолууга тиэрдии — үлэбит сүрүн сыала. 10-н тахса ыаллаахпын. Барыта остуол ньуурунуу буолбат, олох буоллаҕа дии, онон арахсыылар эмиэ бааллар. Көрүһүннэрбит дьонум оҕолорун көрөммүн, улаханнык үөрэбин. Инникитин, улуус салалтатыттан тирэхтээх, өйөбүллэнэрбит буоллар, үлэлииргэ кыаҕырыа этибит. Хас биирдии тэрээһин, үбү-харчыны ирдиир. Онон бу боппуруоһу, аҥардас дьон кыһалҕатын эрэ быһыытынан ылыммакка, бүтүн саха норуотун сайдар кэскилин быһыытынан ылынарбыт буоллар.
Галина Аммосова-Арчылаана, Нам улууһун Хамаҕаттатыгар олорор:
— Мин суорумньунан 9-с сылын дьарыктанабын. Ыал оҥорбут дьонум элбэхтэр, 30-ча оҕолоохпун. Онон киэн туттабын. Суорумньуһут быһыытынан, аҥардас сылдьар дьоммор анкета толоттороммун, базаҕа киллэрэбин. Ыал буоларга баҕалаах киһим интэриэһин, ирдэбилин, гороскобун сыныйан үөрэтэбин. Уус-Алдан, Чурпчы, Мэҥэ-Хаҥалас улуустарыгар элбэхтик дьоммун тиэйэн, суорумньу киэһэлэригэр кыттабыт. Өйөбүл баар буоллаҕына, үлэ тахсыылаах, үтүө түмүктээх буолара саарбаҕа суох. Онон биир киһини икки оҥорон, икки киһини өссө элбэтэр сыаллаах үлэбит сыаналаннар диэн баҕа санаалаахпын.
Сардана Багынанова, “Киин куорат” хаһыат корреспондена:
— Бэйэм үлэлиир хаһыаппар 15 сыл устата “Суорумньу” рубриканы үлэлэтэн кэллим. Мин суорумньуһут буолбатахпын. Ол гынан баран, ити мин салайар рубрикам нөҥүө элбэх дьон билсэн, ыал буолбуттара биллэр. Онон быйылгы пресса баалын көрсө “За результативность “ номинация хаһаайката буолбутум. Республикаҕа ыытыллыбыт “Кыыс ыһыахтарыгар”, суорумньу киэһэлэригэр сылдьан, элбэхтик ити боппуруоһу сырдатан кэллим. Уонна салалта өттүттэн өйөбүл тиийбэтин куруук бэлиэтээн суруйабын.
Бу көрсүһүүгэ кыттыыны ылбыт Аҕа сүбэтин бэрэссэдээтэлин солбуйааччы Леонид Емельянов боппуруоһу өйүүрүн, бииргэ үлэлииргэ бэлэмин эттэ. Онон СР Дьахталларын Сойууһун үлэтин биир хайысхатынан, саха норуотун кыһалҕатынан буолбут — Суорумньу боппуруоһун — Ыччат уонна дьиэ кэргэн политикатыгар министиэристибэ таһымыгар таһаарарга, туруорсарга диэн түмүк оҥордо.
