Сунтаар улууһа өрөспүүбүлүкэҕэ тыа хаһаайыстыбатынан дьарыктанар биир улахан муниципальнай тэриллии буолар. Быйылгы Сылгыһыт күнүн Маар Күөлгэ бэлиэтээтилэр.
Сунтаар улууһун “Бочуоттаах олохтооҕо”, Сунтаар улууһун чулуу сылгыһыта, үлэ, тыыл бэтэрээнэ, ат сүүрдүүтүгэр 25 сыл устата 10 рекордсмен сүүрүк аты, 27 оройуон призерун бэлэмнээбит Петров Егор Николаевич 85 сааһыгар аналлаах «Сылгыһыт күрэҕэ» тэрилиннэ.
Тэрээһин үөрүүлээх арыллыытыгар Егор Николаевичка улуус аҕа баһылыга Анатолий Григорьев СӨ тыатын хаһаайыстыбатын министиэристибэтин “За вклад в развитие табунного коневодства” уонна “Почетный ветеран Сунтарского улуса” бэлиэлэри туттарда.
Сылгыһыттарга хамаанданан уонна биирдиилээн араас көрүҥнэринэн күрэхтэһии тэрилиннэ. Манна нэһилиэктэртэн уопсайа 12 хамаанда кэлэн кыттыыны ылла.
Күрэхтэһии симэхтээх аттар параадтарынан арылынна. Алта түһүмэҕинэн ыытылынна: ат ыҥыырын көтөҕөн сүүрүү, атынан көтүтүү уонна сыарҕалаах атынан куоталаһыы.
Биирдиилээн эстафетаҕа сүүрэн тиийэн аты көлүйүү, тоҥуу хаарынан ат сыарҕатын соһуу, туут хайыһарынан сүүрүү уонна сыал ытааһына киирдилэр.
Күрэх түмүгүнэн хамаанданнан эстафетаҕа
3 миэстэ Күндэйэ нэһилиэгэ
2 миэстэ Маар Күөл нэһилиэгин иккис хамаандата
1 миэстэ Хадан нэһилиэгэ
Биирдиилээн эстафетаҕа
3 миэстэ Бордоҥтон Иван Павлов
2 миэстэ Хадаҥтан Геннадий Пусталяков
1 миэстэ Маар Күөлтэн Александр Никифоров
Аты симээһин күрэҕэр
3 миэстэ Хадан нэһилиэгэ
2 миэстэ Илимниир нэһилиэгэ
1 миэстэ Маар Күөл нэһилиэгэ, суруйда улуус дьаһалтатын пресс-сулууспата.
