Сунтаар улууһугар “Тулалыыр эйгэ харыстабылын уонна доруобуйа” сылын түмүктүүр, “Сүгүрүйүү уонна үйэтитии” сылын көрсөр үөрүүлээх тэрээһин үрдүк таһымҥа тэрилиннэ. История биир чаҕылхай, умнуллубат кэрчигин арыйан көрдүбүт.
“Партизан” НТАК-гэр сунтаардар эрэ буолбакка, нэһилиэктэртэн көхтөөхтүк киирбиттэр. Манна уоттаах сэрии кыттыылаахтарын тутта сылдьыбыт малларын арааһын, 2019 сылга бэчээттэммит кинигэлэри дьон көрүүтүгэр туруордулар. Мантан дьон болҕомтотун тардыбыт Тойбохой мусуойун малларын бэлиэтиэххэ сөп.
Мусуой дириэктэрин солбуйааччыта Марта Ивановна Васильева:
– Биһиэхэ бэлэхтэммит сэрии толоонугар тутта сылдьыбыт малларын харыстаан уура сылдьабыт. Холобур, 100 сааһын былырыын бэлиэтээн баран, күн сириттэн күрэммит ытык киһибит Трофим Николаевич Жирков 1945 сыллаахха билиэҥҥэ тутуллубут офицертан былдьаммыт Курляндия (Латвия) каартатын уонна Роман Гаврильевич Андреев, эмиэ “За отвагу” мэтээллээх киһибит, 1942 сыллаахха сэрии толоонугар сылдьан суруммут блокнотун сэргээтилэр. Бу маны сканердаан, үйэтитэргэ үлэлэһэ сылдьабыт.
Үөрүүлээх тэрээһиҥҥэ улуус баһылыга Анатолий Григорьев эҕэрдэтин тириэрдэн, ааспыт 2019 сылга бастыҥ уонна үчүгэй түмүктээх араас эйгэ үлэһиттэригэр наҕараадалары туттарда.
Тэрээһин ыалдьыта СӨ Тулалыыр эйгэҕэ, айылҕаны туһаныыга уонна ойуур хаһаайыстыбатын миниистирин көмөлөһөөччүтэ Андрей Миронов бастыҥ үлэлээхтэргэ эмиэ эҕэрдэ суруктары, наҕараадалары туттарда. Улуустааҕы айылҕа харыстабылын үлэһиттэрэ “Зеленый пионер” диэн тулалыыр эйгэни харыстыыр этэрээт оҕолоругар күөх хаалтыһы кэтэртилэр.
Ааспыт сылы түмүктүүр, саҥа “Сүгүрүйүү уонна үйэтитии” сылын арыллыытын тэрээһинин нэһилиэктэртэн, Сунтаартан ырыа, үҥкүү эр дьон хордарын ансаамбыллара, искусство оскуолатын үөрэнээччилэрин сэрии ыар өйдөбүлүн биэрэр туруоруулара, хоһоон ааҕыылара, преподавателлэр о.д.а ырыалара тэрээһини олус ситэрэн-хоторон, саалаҕа толору мустубут дьон астына көрдө.
Ааспыт сыл түмүгүнэн бастыҥ үлэлээх нэһилиэк баһылыктарынан үһүс миэстэҕэ Николай Спиридонов (Аллыҥа), иккис Эдуард Филиппов (Сунтаар) уонна бастыҥ үлэлээх кыайыылаах баһылыгынан Ипатий Иванов (Илимниир) ааттаннылар.
Тэрээһин түмүгэр саҥа Сүгүрүйүү уонна үйэтитии сылын бэлиэтин сценаҕа ытыс тыаһынан бар дьон көрүүтүгэр таһаардылар.
Кулууп балаҕаныгар олохтоох оҥорон таһаарааччылар үрүҥ, бурдук ас, эт бородууксуйатын атыылаатылар. Холобур, элгээйилэр былырыыҥҥыттан оҥорор сырдарын дьон былдьаһа-тарыһа ыллылар.
Ааптар: Юлия АЛЕКСЕЕВА. https://ulus.media/2020/02/06/suntaarga-s-g-r-j-uonna-jetitii-sylyn-aryjdylar/
