Сунтаар улууһугар бу ый 18-тан 19-с түүнүгэр күүстээх тыал, хаар түстэ. Элбэх мас суулунна. Электричество уотугар уонна (оптоволокно, стационарнай) сибээс ситимнэригэр саахал тахсан, уот баран ыксаллаах быһыы-майгы буолла.
Күүстээх тыал түһэн, электричество уотугар саахал тахсыбытын туһунан Сунтаар улууһун баһылыгын I солбуйааччы Николай Павлович Александров иһитиннэрдэ:
— Үөскээбит балаһыанньанан сибээстээн, бэҕэһээ балаҕан ыйын 19 күн сарсыарда суһал сүбэ мунньах тэрийдибит. Манна ОДьКХ ГУТ филиала, Якутскэнерго РЭС, Ростелеком тэрилтэлэриттэн кытыннылар. Күүстээх тыал, хаар түмүгэр Аллыҥа, Куокуну, Кириэстээх, Тойбохой, Маар-Күөл, Бордоҥ, Хадан, Илимниир, Бүлүүчээн уонна Кэмпэндээйи нэһилиэктэригэр уота суох буоллулар. Хадан нэһилиэгэр өрүһү туоруур ЛЭП хаабыла быһа баран дьон уота суох олорор. Манна тута РЭС исписэлиистэрэ кэлэн үлэлии сылдьаллар. Бу күн Ростелеком Сунтаардааҕы филиалын салайааччыта Владимир Ильич Семеновтыын балаһыанньаны билсэ миэстэтигэр тиийэ сырыттыбыт. Тустаах нэһилиэктэртэн баҕалаах дьон түмсэн саахал тахсыбыт содулун туоратыыга үлэлэһэллэр. Паромунан уонна дизель генераторынан хааччыйыы оҥоһулунна. Кылгас кэм иһигэр бу үөскээбит кыһалҕаны туоратыыга үлэ ыытылла турар.
Ааптар: Юлия АЛЕКСЕЕВА,СУНТААР.
