Өрөспүүбүлүкэ киэн туттар биир чаҕылхай уола, Саха Өрөспүүбүлүкэтин норуотун хаһаайыстыбатын үтүөлээх үлэһитэ, Сунтаар улууһун Бочуоттаах гражданина, 1997-2000 сылларга Сунтаар улууһун баһылыгынан таһаарыылаахтык үлэлээбит Георгий Петрович Яковлев үтүө аата Сунтаарга үйэтитиллэр.
Георгий Яковлев өбүгэлэрин дойдутугар — Тэҥкэҕэ — нэһилиэк урукку баһылыга А.П. Сидоров тэрийбит мусуойугар Г.П. Яковлев аата иҥэриллибитэ. Ол мусуой иннигэр Георгий Яковлев сырдык кэриэһигэр анаан боруонсаттан чочуллан оҥоһуллубут бюһун туруоруу сиэрэ-туома бу ааспыт субуотаҕа буолла. Тэрээһиҥҥэ «ЭПЛ Даймонд» генеральнай дириэктэрэ П.С. Федоров, Георгий Петрович аҕата П.К. Яковлев, улууспут баһылыга А.В. Григорьев, Г.П. Яковлевы кытта араас кэмҥэ алтыһан ааспыт доҕотторо, Тэҥкэ үгүс олохтоохторо кыттыыны ыллылар. Бюһу Санкт-Петербург куоракка оҥортордулар.
Бюһу Г.П. Яковлев алмаас киэҥ аартыгар иитэн-үөрэтэн, такайан таһаарбыт үөрэнээччитэ, билигин «ЭПЛ Даймонд» генеральнай дириэктэрэ, саха алмааһын кырыылыыр бырамыысыланнаһын билиҥҥи бас-көс киһитэ П.С. Федоров оҥотторбут. Бюһу туруорууга сити күн Дьокуускайтан көтөн кэлээт, быйыл күһүн хаһааҥҥытааҕар да мөлтөөбүт Тэҥкэ суолунан айаннаан кэлбит 92 сааһыгар сылдьар Георгий Яковлев аҕата, Аҕа дойду Улуу сэриитин кыттыылааҕа П.К. Яковлев кыттыыны ылбыта ордук кэрэхсэбиллээх буолла. Петр Константинович бэйэтин этиитигэр бастакы алмаас көрдөөһүнэ бу Тэҥкэ сириттэн саҕаланан, күөдьүйэн барбыта. Онон эһиги билигин «АЛРОСА» АК салалтатыгар нэһилиэк аатыттан аһаҕас сурук суруйуоххутун сөп диэн сүбэ-соргу тылларын эттэ. Улууспут баһылыга Анатолий Григорьев Георгий Яковлев туһунан истиҥ-иһирэх тыллары этэн туран, наставнигын, доҕорун сырдык аатын үйэтитэргэ сүҥкэн кылаатын киллэрбит Петр Федоровка махталын этэр.
Ити курдук махтал тылларын нэһилиэк бастакы баһылыга, Г.П. Яковлевы кытта элбэхтик алтыспыт Григорий Игнатьев уонна билиҥҥи баһылык Николай Попов, Георгий Яковлев эдэр сааһын доҕотторун ааттарыттан Зинаида Иванова эттилэр. Григорий Иванович уобарастаан эппитинии, бэлиэ тэрээһиҥҥэ мустубут дьону бары даҕаны испитигэр, «Туймаада Даймонд» ААО генеральнай дириэктэринэн үлэлии сылдьан, олоҕун саамай айар-тутар кэмигэр соһуччу суох буолбут биир дойдулаахпыт бюһун иннигэр «Дорообо, Георгий Петрович, тапталлаах Бүлүү эбэҥ кытылыгар сырдыкка, үрдүккэ угуйар сулус буолан биһигинниин үйэлэргэ бииргэ буол!» — диэтибит.
