Талаан, дьоҕур, сатабыл, мындыр өй, холку майгы – биирдэ кэлэр олоххо барыта биир киһиэхэ дэлэйдик бэриллэрэ диэн сэдэх көстүү. Маннык дьон чахчы ураты оҥоһуулаах, туһунан толкуйдаах, оннооҕор саҥарардыын, мичээрдиирдиин хайдах эрэ атын буолаллар… Сунтаардар биир оннук дьоҕур доҕордоспут, талаан таба тайаммыт сэдэх киһитинэн Александр Уаровы ааҕаллар. Кини аатынан ыытыллар күрэх кэнники өрөспүүбүлүкэ таһымнаах буолла.
Сунтаардааҕы «Олоҥхо дьиэтэ» төрүт култуура киинигэр тимир, мас ууһа, музыкант, уруһуйдьут, СӨ култууратын туйгуна, «Саха Азия оҕолоро» норуоттар икки ардыларынааҕы пуонда стипендиата, норуот маастара, үрдүк таһымнаах учуутал Александр Ильич Уаров аатын үйэтитэр «Дэгиттэр уус» куонкурус төрдүс төгүлүн ыытылынна. Көрүү-күрэх түөрт сүрүн көрүҥүнэн барар: мас уустара, тимир уустара, ювелирдар уонна уруһуйдьуттар. Манна сааһынан үс бөлөҕүнэн кыттыллар: алын сүһүөх, орто сүһүөх, үрдүкү сүһүөх (улахан дьон). Маны таһынан «Сытыы быһах» диэн биилээх уустарыгар уонна кинилэр үөрэнээччилэригэр туһааннаах күрэх буолла. 2012 уонна 2014 сылларга бу тэрээһин улуус иһинэн, оттон 2016 сылга Бүлүү бөлөх улуустарын икки ардыларыгар ыытыллыбыт эбит буоллаҕына, сунтаардар быйыл өрөспүүбүлүкэ таһымыгар тахсарга холоннулар.
Быйылгы күрэххэ барыта Сунтаартан, Бүлүүчээнтэн, Түбэй Дьаархантан, Күүкэйтэн, Бордоҥтон, Маар Күөлтэн, Элгээйиттэн, Сиэйэттэн, Уһун Күөлтэн, Тойбохойтон, Дьокуускайтан уонна Намтан барыта 93 киһи кытынна. Олортон 63 оҕо, 30 улахан киһи. Көрүҥнэринэн кыайыылаахтар анал бириистэринэн бэлиэтэннилэр.
Бэйэлэрин анал бириистэрин Сунтаар улууһун дьаһалтата, улуустааҕы култуура уонна духуобунай сайдыы уонна үөрэҕирии управлениелара, С.А. Зверев аатынан норуот айымньытын мусуойа, улуус уран тарбахтаахтарын түмсүүтэ, ИП Антонов, виртуоз-хомусчут Никитина А.К., Сунтаардааҕы политехническэй лиссиэй, Сунтаардааҕы оҕо ускуустубатын оскуолата, А.И.Уаров доҕотторо, оҕолоро, аймахтара туруордулар. Бу күрэхтэри таһынан биир суолталаах түгэнинэн Аһымал аукцион буолла. Манна маастардар уонна үөрэнээччилэр үлэлэрэ — быһах, хомус, кырыымпа, мас иһит, хартыына, декоративнай оҥоһук эгэлгэтэ турда. Барыта 75 000 солк. суумалаах үп киирдэ. Бу харчы барыта Сунтаар улууһун Бордоҥуттан сылдьар элбэх оҕолоох соҕотох ийэ кырачаан уолугар – Колесов Стасикка суһал эмтэниитигэр көмө буолан нэһилиэк баһылыгар туттарылынна.
Ааптар: Зоя УАРОВА, А.И.Уаров кэргэнэ
This post was published on 20.12.2018 15:49 15:49