Соторутааҕыта Сунтаар улууһунааҕы байыаннай комиссариат отделын дьиэтигэр үгэскэ кубулуйбут тэрээһин буолан ааста. Хамыыһыйаны ааспыт, чэгиэн доруобуйалаах уолаттары аармыйаҕа атаардыбыт.
Ыччат уонна дьиэ кэргэн бэлиитикэтин отделын исписэлииһэ Станислав Максимов уонна байыаннай комиссариат отделын начаалынньыга Игорь Данилов кыттыыны ыллылар, уолаттарга сөптөөх сүбэ-ама биэрдилэр.
Мустубут уолаттар сэтинньи 7 күнүгэр Дьокуускай куоракка көтүөхтэрэ. Бу иннинэ барбыт 5 уол алтынньы 20 күнүгэр сулууспалыыр чаастарыгар тиийэн, билигин номнуо сулууспалыы сылдьаллар. Уолаттар сүрүннээн салгыннааҕы байыаннай, танковай чаастарга тиийбиттэр.
– Дьоҥҥутун кытары сибээһи быһымаҥ. Кылгастык да буоллар, телефонунан эрийэн билсэ туруҥ. Дьоҥҥут эһиги тускутугар долгуйалларын өйдөөҥ, – диэн байыаннай комиссариат отделын начаалынньыга Игорь Семенович уолаттарга сүбэлээтэ.
Уолаттар үксүлэрэ доруобуйаларынан кыра хааччахтардаах байыаннай сулууспаҕа сөп түбэһэллэринэн, хонуутааҕы сэриилэргэ, ол эбэтэр сибээс, пехота курдук чаастарга түбэһиэхтэрэ.
Быйылгы ыҥырыыга 28 оҕо барара былааннанар. Бүгүҥҥү күҥҥэ 18 уол медицинскэй хамыыһыйаны ааһан, сулууспалыы бараллара билиннэ. Оттон атыттар өссө да хамыыһыйаны ааһа сылдьаллар.
Августина Кирилловна Попова, Тойбохой олохтооҕо, төрөппүт:
– Улахан уолум оскуоланы бүтэрээт, баран эрэр. Бэйэм 4 уоллаахпын. Эһиил иккис уолум эмиэ оскуоланы бүтэрэр. Уолум Коля барыахпын баҕарабын диэн бэйэтэ быһаарынна. Биллэн турар, наһаа долгуйабын. Биир сыл диэн дьиҥинэн кылгас. Онон баран кэлэ охсоро буоллар үчүгэй буолуо этэ.
