29 Кулун тутар 29.03
  • -15°
  • $ 92,37
  • 99,53

Сунтаар улууһун киин балыыһата 100 сылын бэлиэтээтэ

Читайте нас на
Яндекс Новости
ЯДВ

Ааспыт субуота күн «Бартыһаан» култуура киинигэр Сунтаар улууһунааҕы киин балыыһа тэриллибитэ 100 сылын бэлиэтиир үөрүүлээх тэрээһинэ буолла. Манна билигин үлэлии сылдьар эмп үлэһиттэрин сэргэ бэтэрээннэр бааллар. Күндү ыалдьыттар саалаҕа киириэхтэрин иннинэ фойеҕа тэриллибит быыстапканы сэргии көрдүлэр. Ону ааһан уохтаах кымыс, алаадьы күндүлээһиннээх буолла.


Үөрүүлээх тэрээһин саҕаланыыта бастакынан тылы улуус кылаабынай бырааһа Иван Попов ылла. Бастатан туран, кини кэлбит дьону бырааһынньыгынан эҕэрдэлээтэ. Билиҥҥи үлэлэригэр улуустааҕы киин балыыһа нэһилиэк дьаһалталарын кытары сомоҕолоһон үлэлииллэрин туһунан эттэ. Оннук дьаһаннахха эрэ үлэлэрэ түмүктээх буолуоҕун ыйда. Билигин балыыһа комплексын иккис уочарата тутулларыгар үлэлэһэ сылдьалларын иһитиннэрдэ. Бу хайысхаҕа министиэристибэни кытта үлэ ыытыллар. Былаан быһыытынан Химия оройуонугар медиктэр саҥа микрооройуоннара тэриллиэхтээх.

Үбүлүөйүнэй тэрээһиҥҥэ СӨ доруобуйа харыстабылын миниис-тирин солбуйааччы Олег Припузов кыттыыны ылла. Кини үлэһиттэри, бэтэрээннэри итиитик-истиҥник эҕэрдэлээн туран, ведомственнай наҕараадалары туттарда. Ол курдук Саха Өрөспүүбүлүкэтин доруобуйатын харыстабылын туйгуннарынан буоллулар: быраас Л.С.Васильева, улуус кылаабынай бырааһын солбуйааччы Л.А.Данилова, А.В.Дохунаева, Е.И.Никифорова, Р.Е.Попова, Л.Е.Прокопьева, М.И.Романова, Р.И.Саввинова, А.И.Семенова, Г.П.Семенова, С.П.Тихонова, Г.Е.Федотова, И.Е.Федорова уо.д.а.

Улуус баһылыга Анатолий Григорьев доруобуйа харыстабылын үлэһиттэрин бырааһынньыктарынан итиитик-истиҥник эҕэрдэлээн туран, наҕараадалары туттартаата. Олортон улуус Бочуотунай грамотатын сэргэ «За вклад в развитие зравоохранения Сунтарского улуса» бэлиэлэри туттарда.

Бу күн үгүс киһи наҕараадалары тутан үөрдэ-көттө. Кинилэр дьиҥнээх көлөһүннэрин тоҕон ылбыт наҕараадалара буолар.

Үбүлүөйү көрсө саҥа кинигэ сүрэхтэниитэ буолла. Кинигэни бэйэтэ Сиэйэттэн төрүттээх Зинаида Игнатьева сүүрэн-көтөн, түмэн, таҥан, хомуйан оҥорбут. Кинигэ 500 ахсаанынан тахсыбыт, 300-тэн тахса страницалаах. Киниэхэ юстиция бэтэрээнэ, биир дойдулаахпыт Михаил Люй Ден күүс-көмө буолбут. Бу күннэргэ күн сирин көрбүт кинигэни бэтэрээннэргэ бэлэх ууннулар.

Ити курдук үгүс эҕэрдэ тыла этилиннэ. Эҕэрдэ кэнсиэр да олус сэргэх буолла. Ол курдук бэйэлэрин ырыаларын мустубут дьоҥҥо Мария, Василий Спиридоновтар, Анна Тотонова, Алина Секова уо.д.а. бэлэхтээтилэр.

Следите за самым важным и интересным в Telegram-канале и WhatsApp-группе ЯСИА
Тутаах тыллар