Сунтаар улууһун Тэҥкэ нэһилиэгэр уу ыраастыыр ыстаансыйа, спортивнай былаһаакка, эдэр исписэлиистэр олороллоругар икки кыбартыыралаах уопсай дьиэ үөрүүлээх быһыыга-майгыга, атырдьах ыйын 30 күнүгэр арылыннылар. Аҕыйах нэһилиэнньэлээх кытыы сытар нэһилиэккэ бу улахан суолталаах түгэн.
Тэҥкэҕэ ыраас уу ыстаансыйатын аһыллыыта бу кэмҥэ тоҕоостооҕун бэлиэтээн туран, олохтоохтор улууһун баһылыга Анатолий Григорьевка махтал тылларын эттилэр. Сунтаар улууһун дьаһалтата эрдэттэн дьаһанан, Бүлүү өрүс үрдүгэр сытар сорох нэһилиэктэргэ уу ыраастыыр ыстаансыйалар тутууларын саҕалаан, нэһилиэнньэни аймаабыт быһылааны бэлэмнээх көрсүбүтэ.
Улуус аннынан эбэҕэ кирдээх уу кэлээтин кытары, ыстаансыйалар тута нэһилиэнньэни ыраас уунан хааччыйбыттара.
2016 с. Сунтаар улууһа бэйэтин бүддьүөтүттэн 12 уу ыраастыыр ыстаансыйаны Кутана, Элгээйи, Куокуну, Кириэстээх, Наахара, Илимниир, Бордоҥ, Тэҥкэ, Хадан, Сиэйэ, Түбэй, Түбэй Дьаархан нэһилиэктэригэр тутан саҕалаабыта.
