Сунтаар улууһун нэһилиэктэригэр ыытылла турар бары тутуулары улуус баһылыга Анатолий Григорьев бэйэтин кытаанах хонтуруолугар тутар. Кэмиттэн кэмигэр баран көрөр, итэҕэстэри-быһастары туоратарга дьаһал биэрэр. Бу күннэргэ Бүлүүчээн, Кириэстээх уонна Уһун Күөл эбийиэктэрин көрдүлэр.


Бу күннэргэ Сунтаар улууһун баһылыга Анатолий Григорьев улуустааҕы тутуу комплексын управлениетын начаалынньыга Иван Егоровы кытары оробуочай сырыынан Бүлүүчээҥҥэ, Кириэстээххэ уонна Уһун Күөлгэ сырыттылар.

Анатолий Васильевич уонна Иван Иванович Бүлүүчээн нэһилиэгэр ууну ыраастыыр ыстаансыйа тутуутун көрдүлэр. Тутуу үлэтэ хойутаан, уу барар турбаларын ситимэ ааһыахтаах ханаабалар көмүллүбэккэлэр, тыа сирин олохтоохторо от-мас тиэнэллэригэр кэккэ мэһэйдэри үөскэппит.

Бүгүн Бүлүүчээн нэһилиэгин дьаһалтата, бэдэрээтчик «Инфинити» ХЭТ нэһилиэнньэни кытары көрсөн бу кыһалҕаны туоратары дьүүллэстилэр. Кириэстээх нэһилиэгэр успуорт саала тутуутун уонна кулууп өрөмүөнүн билистилэр. Үлэ былаан быһыытынан бара турар. Оттон Уһун Күөлгэ саҥа хочуолунай үлэлээн, оскуолаҕа ититии толору бэриллэн турар.

Ааптар: Станислав Ноговицын 

0
0
comments powered by HyperComments