Ааспыт нэдиэлэҕэ улуус дьаһалтаыгар нэһилиэк баһылыктарын мунньаҕа буолан ааста. Бу мунньах от, тутуу уонна Уһук Илиннээҕи гектар боппуруостарын тула буолла.
Улуус баһылыга Анатолий Григорьев Үөһээ Бүлүү улууһугар буолбут СӨ Ил Дархана Егор Борисов Бүлүү бөлөх улуустарын баһылыктарын көрсүһүүтүттэн сырдатта. Сотору кэминэн СӨ Бырабыыталыстыбатын бэрэссэдээтэлэ Галина Данчикова Сунтаар улууһугар рабочай сырыынан кэлиэхтээҕин туһунан эттэ.
Салгыы кыстыыр оту булунуу уустугун бэлиэтээтэ. Чааһынай дьон кыстыыр оппутун онтон-мантан оттоон булуохпут, кур от да баар дииллэр. Оттон улахан хаһаайыстыбаларга балаһыанньа ыарахан. Өрөспүүбүлүкэ үрдүнэн от үүнүүтэ мөлтөх буолан, атын улуустартан от кэлэрин күүппэппит. Ыраах, саппааска уонна оттоммокко сытар сирдэри испииһэктииргэ дьаһал ылыллыбыт. Анатолий Васильевич нэһилиэк баһылыктарыгар, тыа хаһаайыстыбатын исписэлиистэригэр оттоммокко хаалбыт сирдэри учуокка ылалларыгар сорудахтаата. Ити үлэ түмүгэр, сүбэлэһии кэнниттэн улууспутугар көҥүл хотуур биллэриллиэҕэ.
Сыл аайы Мииринэй оройуонуттан «Новай» сопхуос кэлэн, нэһилиэнньэттэн от атыылаһан барар. Быйыл даҕаны кэлэ сылдьыбыттар. Улуус баһылыга нэһилиэк баһылыктарыттан дьоҥҥо «улуус таһыгар буолбакка, бэйэбит испитигэр атыылаабыт ордук» диэн өйдөтүү үлэтин ыыталларыгар эттэ. Урукку сылларга «Кириэстээх» ТХПК сылларга нэһилиэнньэттэн от ылан баран кыайан төлөспөтөҕө диэн дьон харчыларын тута сылдьар «новайдарга» атыылыан баҕарар. Билигин «Кириэстээх» хаһаайыстыбатын балаһыанньата тубуста, оту харчытыгар даҕаны, сиилэскэ атастаһан даҕаны ылар кыахтаах.
Маны таһынан, нэһилиэктэринэн уу отун охсорго «Күүлэй» тэрийэргэ, муус отун охсон ыларга этиилэр киирдилэр.
Улууспут нэһилиэктэригэр элбэх тутуу үлэтэ барар. Онон, бу нэһилиэк баһылыктарын мунньаҕар тутуу тула кэпсэтии эмиэ барда. «Үтүө дьыала» чэрчитинэн тутуллубут эбийиэктэр, кистээбэккэ эттэххэ, хаачыстыбалара мөлтөх соҕус. Өрөспүүбүлүкэ үрдүнэн хас даҕаны саҥа тутуллубут эбийиэк сууллубут. Хата, дьон эчэйиитэ суох. Манан сибээстээн, билигин тутуу өттүгэр улахан хонтуруол ирдэнэр буолбут. Нэһилиэктэргэ, тутуу барар сиригэр, тутулуга суох хонтуруол баара булгуччулаах эбит.
Быйыл Уһун Күөлгэ элбэх, уһун туруорсуу кэнниттэн, 80 миэстэлээх таас оскуола тутуута саҕаламмыта. Бу тутуу уопсай суумата 170 мөл. солк. тэҥнэһэр. Бу мантан 67 мөл. солк. «АЛРОСА» АК дивидениттэн көрүллүбүт. Өссө даҕаны сүүстэн тахса мөлүйүөн наада. Эмиэ быйыл Кириэстээх нэһилиэгэр оскуола тутуута саҕаланыахтаах. 5 мөл. солк. дивидентэн көрүллэр. Үөһээ этэн аһарыллыбытын курдук, сотору Саха Өрөспүүбүлүкэтин Бырабыыталыстыбатын бэрэссэдээтэлэ Галина Данчикова рабочай сырыынан кэлэрэ былааннанар. Анатолий Васильевич Галина Иннокентьевнаттан бу икки эбийиэги инвестиционнай бүддьүөккэ киллэрэри туруорсар наадалааҕын бэлиэтээтэ.
Салгыы КИО бэрэссэдээтэлэ Семен Саморцев Уһук Илиҥҥи гектар сокуонугар туох үлэ ыытылларын кэпсээтэ. Билигин сүрүннээн нэһилиэнньэттэн сири докумуоннаһыыга сирдээҕин туһунан туоһу докумуон (уведомление) хомуйуу бара турар. Бу сир хаһаайыннаах диэн уведомление биэрдэххинэ, эйиэхэ сиргин ситэри докумуоннаһаргар алта ыйга бириэмэ бэриллэр. Хомойуох иһин, өрөспүүбүлүкэ үрдүнэн бу үлэ хамыыта соччото суох. Балаҕан ыйын 31 күнүгэр диэри уведомление барыта нэһилиэнньэттэн хомуллан анал систиэмэҕэ киириэхтээх. Оччотугар, алтынньы 1 күнүттэн алта ый устата киирбит сирдэри Уһук Илиннээҕи гектар сокуонуттан таһааран эрэллэр. Уведомление биэрэргэ нотариуһунан бигэргэммит сирдээх-хин туоһулуур докумуоннар куопуйалара булгуччулаах. Тыа нэһилиэктэригэр нотариус оннугар олохтоох дьаһалтаҕа бигэргэтиллэр.
