Дьокуускай куорат «Триумф» спортивнай комплексыгар отутус төгүлүн өрөспүүбүлүкэтээҕи Чөмпүйүөннэр бааллара буолла. Манна ааһан эрэр 2018 сыл бастыҥ спортсменнара, тириэньэрдэрэ, ситиһиилэрэ чиэстэннилэр. Манна Сунтаар улууһа спорт хайысхатыгар бастыҥ көрдөрүүлээҕинэн бастыҥ аатын ылла.
2018 сыл Чөмпүйүөннэр баалларын «Бастыҥ муниципальнай тэриллии» номинация хаһаайынынан Сунтаар улууһа ааттанна. Наҕарааданы аҕа баһылык Анатолий Григорьев тутта.
Алена Дмитриева Арассыыйа успуордун үтүөлээх маастара буолбута, улуустан физическай култуура уонна успуорт үтүөлээх үлэһитэ, үс физическай култуура уонна успуорт туйгуна баар буолбуттара бу номинацияны ситиһэргэ сүрүн төрүөттэринэн буоллулар. Ааһан эрэр 2018 сылга Сунтаар улууһугар үс спортивнай былаһаакка үлэҕэ киирдэ.
Улууска адаптивнай успуорту, чөл олоҕу пропагандалааһын күүскэ барар. Ол түмүгэ – өрөспүүбүлүкэ үрдүнэн нэһилиэнньэ маассабайдык успуордунан дьарыктаныытыгар Сунтаар улууһа инники күөҥҥэ сылдьар. Профессиональнай спорка Алена Дмитриева Аан Дойду чөмпүйүөнэ, Николай Охлопков Аан Дойду призера буолбуттара элбэҕи этэр.
Ааптар: Станислав Ноговицын
This post was published on 28.12.2018 14:33 14:33