Бүгүҥҥүттэн Дьокуускай куорат эдэр спортсменнарыгар спортивнай-бальнай үҥкүүгэ сбор саҕаланна. «Квик-Степ» спортивнай үҥкүү кулууба Санкт-Петербургтан тренердэри ыҥырда.
Европа уонна Россия турнирдарын хас да төгүллээх чемпионнара уонна призердара Вера Нам уонна Виктор Преснецов Дьокуускай куоракка үлэлэрин саҕалаатылар.
Оҕолор кинилэри бэйэлэрин эрчиллэр саалаларыгар күүппүттэрэ ыраатта. Виктор Михайлович Саха сиригэр хаһыс да сырыытах. Кини оҕолору үөрэтэригэр талаанын төрөппүттэр сэргииллэр. «Уопуттаах тренери кытта үлэ кэнниттэн, оҕолорбут олус элбэҕи ситиһэллэр. Араас турнирдарга кыттан, кыайан, биһигини үөрдэллэр. Оҕо эстетикэ уонна эт-сиин өттүнэн сайдарыгар олус туһалаах бу көрүҥ республикаҕа сайдарыгар баҕалаахпыт», — диэн төрөппүт Ольга Семенова СИА-ҕа кэпсээтэ.
Бу сырыыга Виктор Преснецов бэйэтин бииргэ үҥкүүлүүр Вера Намы кытта кэлбиттэр. Паара европейскай бырагырааманан үҥкүүгэ бастыҥнар ортолоругар сылдьар. Ону «ПРОФЕССИОНАЛ» ФТС кэтээн көрүүтүн түмүгэ кэпсиир: 2015 сылга үҥкүүһүт паара иккис үктэлгэ турар.
Виктор Преснецов этэринэн, Саха сирин оҕолорун үҥкүүгэ таһымнара Россия киин куораттарыгар дьарыктанааччылартан туох да уратыта суох. «Бу кулууп салайааччытын Дмитрий Никитин үтүөтэ. Оҕолор турнирдарга ситимин быспакка кыттыахтарын наада», — диир тренер.
«Квик-Степ» кулууп, «Триумф», «Реверанс», «Дуэт» кулууптары кытта сэргэ, дойду «Россия үҥкүүгэ спордун Союһа» федерациятын чилиэнинэн буолар.
